Ջասթին Բիբեր ներկայացած ավստրալացուն մեղադրում են երեխաների նկատմամբ ոտնձգությունների հարյուրավոր դեպքերի համար

Կանադացի հանրահայտ երգիչ Ջասթին Բիբեր ներկայացած ավստրալացու նկատմամբ առաջադրվել է սեռական բնույթի 931 հանցագործության մեղադրանք, գրում է BBC-ի ռուսական ծառայությունը:

Ինչպես հայտնում է Քուինսլենդ նահանգի ոստիկանությունը, 42-ամյա տղամարդը ներկայացել է որպես Բիբեր և խնդրել երեխաներին իրենց անկեղծ լուսանկարներն ուղարկել իրեն:

Իրավապահ մարմինների տվյալներով՝ տղամարդը երեխաների հետ շփման համար օգտագործել է տարբեր առցանց հարթակներ՝ այդ թվում Facebook և Skype:

Բացի անչափահասների նկատմամբ սեռական ոտնձգությունների մեղադրանքներից՝ տղամարդուն առաջադրվել են մեղադրանքներ երեք բռնաբարության համար:

Ոստիկանությունը կոչ է արել Ջասթին Բիբերի երիտասարդ երկրպագուներին և նրանց ծնողներին զգոնություն դրսևորել:

Ոստիկանությունը նշել է, որ տղամարդը հավանաբար շփվել է տարբեր երկրներից երեխաների հետ: Նա դատարանի առաջ կկանգի Բրիսբենում, ապրիլի 6-ին: