Նա ինձ համար 2-րդ հայր էր. Դուեյն Ջոնսոնի հուզիչ գրառումը՝ Boston ռոք խմբի հայազգի թմբկահարի մահվան առնչությամբ (լուսանկարներ)

Հոլիվուդյան մարտաֆիլմերի սիրված աստղ Դուեյն Ջոնսոնն անդրադարձել է Boston ռոք խմբի թմբկահար Սայբ Հաշյանի մահվանը՝ նշելով, որ հանգուցյալն իր համար «2-րդ հայր էր»:

Ինչպես նշում է The Daily Mail-ը, 67 տարեկանում մահացած Հաշյանը դերասանի կնոջ՝ Լորեն Հաշյանի հայրն էր:

«Խաղաղությամբ հանգչի'ր, իմ երկրո՛րդ հայր Սայբ Հաշյան: Չգիտեմ, թե ինչու է այնպես պատահում, որ մեր սիրելիները մեզ լքում են հանկարծակի՝ թույլ չտալով անգամ վերջին հրաժեշտը տալ:

Այս մարդն ապրել է լիարժեք ու հետաքրքիր կյանք, ստեղծել հրաշալի ընտանիք, որին սիրել է ու պաշտպանել:

Շնորհակալ ենք այն բոլոր դասերի համար, որոնք տարիների ընթացքում մեզ տվել ես: Մենք քեզ սիրում ենք Սայբ»,-իր Instagram-ի էջում գրել է Ջոնսոնը:

Ինչպես ավելի վաղ հայտնել էր Tert.am-ը, Boston ռոք խմբի անդամ Սայբ Հաշյանը մահացել է բեմի վրա` համերգի ժամանակ: 

Հաշյանը ելույթ է ունեցել կրուիզային նավում Rock Legends Cruise շրջագայության շրջանակում: Անսպասելիորեն նա վատ է զգացել իրեն և ընկել: Երաժշտին փորձել են վերակենդանացնել, սակայն նրան չի հաջողվել փրկել:

Հայտնի է, որ Սայբ Հաշյանը եղել է 1976 թվականին կազմավորված Boston խմբի առաջին անդամներից մեկը: Նա մասնակցել է խմբի առաջին ալբոմի ձայնագրությանը, որի մեջ մտել է խմբի ամենահայտնի կատարումներից մեկը` More Than a Feeling երգը: Երաժիշտը նաև մասնակցել է խմբի երկրորդ` Don't Look Back ձայնասկավառակի, ինչպես նաև Long Time և Peace of Mind երգերի ստեղծմանը: Հաշյանը խումբը լքել է երկրորդ ալբոմի թողարկումից հետո:

Իր գրառմանը կից Ջոնսոնը հրապարակել է հանգուցյալի, իր կնոջ ու 15 ամսական դստեր մասնակցությամբ ընտանեկան լուսանկարը՝