Փոփոխություններ կատարելու համար պետք չէ լինել ԱԺ նախագահ, պետք է լինել՝ կազմակերպված ընդդիմություն. Վահրամ Բաղդասարյան
Երբ իշխանությունն իր թիկունքում զգում է ուժեղ իշխանության շունչը, զգոն է լինում: Մեր նպատակը դա է՝ ունենալ կառուցողական, ուժեղ ընդդիմություն: ԱԺ նիստում այս մասին հայտարարեց ՀՀԿ խմբակցության ղեկավար Վահրամ Բաղդասարյանը:
Անդրադառնալով «ԵԼՔ» խմբակցության ղեկավար Նիկոլ Փաշինյանի հայտարարությանը, ով ասում էր, թե Ադրբեջանի և Հայաստանի տարբերությունը կարելի է ցույց տալ՝ ընտրելով ԱԺ նախագահին փոքրամասնությունից, ապա Վահրամ Բաղդասարյանն այսպես արձագանքեց. «Նախ ինձ զարմացրեց, որ պարոն Փաշինյանը Ադրբեջանի փոխարեն երաշխավորում է: Ի՞նչ կապ կա, որ երաշխավորում եք… Եվ մեկ անգամ հայտարարում եմ, որ ՀՀԿ-ն ձգտում է ունենալ կառուցողական, ուժեղ ընդդիմություն: Յուրաքանչյուր երկրում էլ, երբ իշխանությունն իր թիկունքում զգում է ուժեղ իշխանության շունչը, զգոն է լինում: Մեր նպատակը դա է՝ ունենալ կառուցողական, ուժեղ ընդդիմություն»:
Բաղդասարյանի խոսքով՝ իրենք ընդդիմության հետ համագործակցել են համագործակցելու են տարբեր օրինագծերի շրջանակներում:
ԱԺ նախագահը, Վահրամ Բաղդասարյանի խոսքով, պարզապես խոսնակ է և չի կարող փոփոխություններ կատարել, իսկ փոփոխություններ կատարելու համար պետք չէ լինել ԱԺ նախագահ, պետք է լինել՝ կազմակերպված ընդդիմություն: «ԱԺ նախագահը թելադրող չէ, նաչալնիկ չէ, խոսնակն է»,- ասաց նա:
Դիմելով ընդդիմությանը Բաղդասարյանը նշեց. «Դուք ցավ եք ապրում, որ մենք անխոցելի թեկնածու ենք առաջադրում: Նա 15 տարիների փորձ ունի, նա ցույց է տվել իր հայրենանվեր աշխատանքը, ամուր կապեր է ստեղծել տարբեր երկրների հետ: Շատ խոսել, միկրոֆոններից ելույթներ ունենալ թեմայի, եթերի հետ չկապված մենք չենք առաջադրում»:
Նիկոլ Փաշինյանն էլ արձագանքեց. «Ձեր ելույթով ամեն ինչի գնահատականը տվեցիք: Պետության 2-րդ դեմքի մասին ՀՀԿ-ն ասում եք՝ դե խոսնակ ա ընդամենը: Սա պարոն Բաբլոյանի նկատմամբ էլ վիրավորանք է»:










