Հայտնի է դարձել հոգեկանի համար ամենավտանգավոր սոցցանցը

20:29 • 19.05.17

Բրիտանական BBC News-ը վարկանիշ է կազմել, որում առանձնացրել է հոգեկան առողջության համար ամենավտանգավոր սոցցանցը: Հետազոտության արդյունքները հրապարակվել են հեռուստաալիքի կայքում:

Ինչպես նշում է հետազոտության նկարագրությունում, Առողջապահության Բրիտանական Թագավորական միության անդամները 14-24 տարեկան 1,5 հազար մարդու սոցհարցում են անցկացրել՝ առաջարկելով գնահատել, թե տարածված հավելվածներից որոնք են առավել անբարենպաստ ազդեցություն ունենում հոգեկան վիճակի վրա, ինչպես նաև ընկճախտ, ագրեսիա և անհանգստության զգացողություն առաջացնում:

Հարցման արդյունքում պարզվել է, որ հոգեկան առողջության համար ամենավտանգավորն է համարվում Instagram սոցցանցը: Վարկանիշի երկրորդ տեղը զբաղեցրել է Facebook-ը, իսկ երրորդը` Snapchat-ը:

Նշվում է, որ բացահայտվել են նաև համացանցի օգտատերերի վրա բարենպաստ ազդեցություն գործող հավելվածները. դրանց շարքում առաջին տեղը զբաղեցրել է YouTube-ը, իսկ երկրորդը՝ Twitter-ը:

Առողջապահության Բրիտանական Թագավորական միության գործադիր տնօրեն Շիրլի Քրամերի խոսքով՝ Instagram-ը և Snapchat-ը մասնագիտացած են լուսանկարներ հրապարակելու վրա և կարող են անհանգստության կամ անլիարժեքության զգացողություն առաջացնել երիտասարդ օգտատերերի մոտ:

Հետազոտությունից հետո առողջապահության միության փորձագետները դիմել են սոցցանցերի ադմինիստրացիաներին՝ խնդրելով ստուգումների շարք իրականացնել և միջոցներ ձեռնարկել օգտատերերի հոգեկան խախտումների խնդիրները լուծելու հարցում:

Ի պատասխան այս խնդրանքին Instagram-ի ներկայացուցիչները հայտնել են, որ իրենք պահպանում են սոցցանցի անվտանգությունն ու բարենպաստությունն օգտատերերի համար:

«Վայրը, որտեղ մարդիկ, ինքնարտաhայտելով, հարմարավետ են զգում իրենց. սա մեր գլխավոր սկզբունքն է, մանավանդ եթե խոսվում է երիտասարդ օգտատերերի մասին», - նշել են Instagram-ի ներկայացուցիչները: