Նյու Յորքում մարդկանց վրա մեքենան ուղղած մարդը հայտարարել է, որ «ձայներ է լսել» (լուսանկարներ, տեսանյութ)
Նյու Յորքում՝ Թայմս սքուերում, անցորդների վրա մեքենան ուղղած ավտոմեքենայի վարորդը հայտնել է ոստիկանությանը, որ «ձայներ է լսել» և կարծել է, թե մահանալու է: Այս մասին հայտնում է Associated Press գործակալությունը՝ վկայակոչելով իրավապահներին:
Ավտոմեքենայի ղեկին գտնվող 26-ամյա Ռիչարդ Ռոխասը դեպքից հետո փորձել է փախուստի դիմել, բայց ձերբակալվել է: Այժմ նա գտնվում է ոստիկանական բաժանմունքում:
Իրավապահներից մեկը պատմել է, որ ռազմածովային նավատորմի վետերան Ռոխասը ձերբակալվել է անցած շաբաթ նոտարական գրասենյակի աշխատակցի վրա դանակ ուղղելու համար: Ոստիկաններից մեկը հայտնել է, որ նախորդ ձերբակալության ժամանակ Ռոխասը վախենում էր, որ իրեն հետապնդում են:
«Որևէ վկայություն չկա, որ սա ահաբեկչություն էր»,- ասել է քաղաքապետ Բիլ դե Բլազիոն:
Ավելի վաղ հաղորդվել է, որ ԱՄՆ Նյու Յորք քաղաքի Թայմս սքուեր հրապարակում տեղի ունեցած արտակարգ պատահարի հետևանքով վիրավորների թիվը հասել է 23-ի: Մարդատար ավտոմեքենան մեծ արագությամբ ընթացել է հետիոտների ուղղությամբ: Պատահարի ժամանակ ստացած վնասվածքներից երիտասարդ կին է մահացել:
















