ՌԴ-ն ԵԱՏՄ մեր անդամակցությունից հետո ավելի մեծ քանակի կործանարար զենք է վաճառել Ադրբեջանին. Էդմոն Մարուքյան (տեսանյութ)
ՀՀ ԱԺ «Ելք» դաշինքի պատգամավոր Էդմոն Մարուքյանն Ազգային Ժողովում ելույթների ժամին, մինչ հանձնաժողովների նախագահների թեկնածուների մասին խոսելն, անդրադարձավ իրենից առաջ ելույթ ունեցող ԱԺ նախագահ Էդուարդ Շարմազանովի ելույթին: «Հատկանշական է, որ Էդուարդ Շարմազանովի ժամանակն ավարտվեց Հրայր Թովմասյանի թեկնածությունը ներկայացնելու պահին, բայց այդքանը, դա հումոր էր»,--ասաց նա:
Էդմոն Մարուքյանը խոսեց, մասնավորապես, Խոսրով Հարությունյանի այն հայտարարության մասին, թե ՀՀ-ն ԵԱՏՄ-ին անդամագրվելիս այլընտրանք չի ունեցել: «Այն պահին, երբ մենք հրաժարվեցինք ԵՄ ասոցացման համաձայնագիրը ստորագրելուց, դրանով հրաժարվեցինք ինտեգրվելուց Եվրոպական տնտեսական գոտուն»,-ասաց նա:
Ինչ վերաբերում է այն դիրքորոշմանը, թե անվտանգությունից ելնելով ենք անդամագրվել ԵԱՏՄ–ը, ապա պատգամավորն ասաց, որ ապրիլյան պատերազմն ապացուցեց, որ անվտանգության առումով ոչինչ չստացանք: «Ավելին, Ռուսաստանը ԵԱՏՄ մեր անդամակցությունից հետո ավելի մեծ քանակի կործանարար զենք է վաճառել Ադրբեջանին, քան մինչ այդ: Երևի, դա էլ այդ միության փաթեթի մեջ է մտնում»,-ասաց նա և արձանագրեց, որ Հայաստանն ունեցել է այլընտրանք և հրաժարվել է դրանից:
«Այսինքն` անվտանգության համար մտել ենք, չունենք անվտանգություն, տնտեսությունը զարգանալու համար մտել ենք, տնտեսությունը չի զարգացել»,-ասաց նա և նշեց, որ ասոցացման համաձայնագիրը դարակում դրված է, որովհետև անհամատեղելի է ԵԱՏՄ անդամ լինելը խորը համապարփակ համաձայնագիրը ստորագրելու հետ:










