Գյումրիում ռուս զինծառայողի սպանության գործով կասկածյալը հրաժարվել է նաև երկրորդ հանրային պաշտպանից
Գյումրիում տեղակայված ռուսական 102-րդ ռազմաբազայի զինծառայող Դմիտրի Յալպաևի սպանության գործով նշանակված փորձաքննությունների արդյունքները դեռ հայտնի չեն:
Այս մասին Tert.am-ի հետ զրույցում ասաց զինծառայողի սպանության կասկածանքով կալանավորված Արման Ջանջուղազյանի պաշտպան Գուրգեն Հարությունյանը:
«Նշանակված դատաբժշկական, դատաքրեագիտական, դատակենսաբանական փորձաքննությունների արդյունքները դեռ պարզ չեն: Այլ մանրամասներ հրապարակման ենթակա չեն»,-ասաց պաշտպանը:
Հարությունյանը հայտնեց, որ ինչպես նախկինում ասվել է, իր պաշտպանը հոգեկան խնդիրներ ունի, իսկ կալանավորումից հետո գտնվում է «Երևան» ՔԿՀ-ում:
Պաշտպանը հաստատեց նաև այն լուրը, որ Արման Ջանջուղազյանը հրաժարվել է հանրային պաշտպան Սյուզան Խչեյանի պաշտպանությունից. «Դա Արման Ջանջուղազյանի իրավունքն է»:
Նշենք, որ Գուրգեն Հարությունյանն Արման Ջանջուղազյանի երրորդ պաշտպանն է: Նախկինում նրա շահերը պաշտպանել է նաև փաստաբան Արամայիս Հայրապետյանը:
Հիշեցնենք, որ ապրիլի 22-ին Գյումրիում 102-րդ ռուսական ռազմաբազայի զինծառայողի դի էր հայտնաբերվել: Որոշ ժամանակ անց սպանության կասկածանքով բերման էր ենթարկվել 20-ամյա Արման Ջանջուղազյանը, ով այնուհետև կալանավորվել է: Փաստով հարուցվել է քրեական գործ՝ 104-րդ հոդվածի (սպանություն) 1-ին մասի հատկանիշներով` ապօրինաբար մեկ ուրիշին դիտավորությամբ կյանքից զրկելը, որը պատժվում է ազատազրկմամբ՝ 8-15 տարի ժամկետով:










