Թրամփը մահմեդականներին կոչ է արել համախմբվել ահաբեկչության դեմ պայքարում
ԱՄՆ նախագահ Դոնալդ Թրամփը մահմեդական ողջ աշխարհին կոչ է արել համախմբվել ահաբեկչության դեմ պայքարում՝ Սաուդյան Արաբիայում տարածաշրջանային գագաթաժողովին մասնակցող մահմեդական պետությունների ղեկավարներին ասելով, որ խոսքը «բարու և չարի պայքարի մասին է»:
Նրանց բոլորին դիմելով՝ Թրամփը հայտարարել է, որ ԱՄՆ-ն իր հետ հույսի և սիրո ուղերձ է բերել և որ հենց դրանով է բացատրվում այն, որ որպես նախագահ Թրամփի առաջին միջազգային այցը հենց դեպի Սաուդյան Արաբիա է եղել:
Նա հայտարարել է, որ ԱՄՆ-ը ձգտում է երկրների կոալիցիա ստեղծել, «որոնք ընդհանուր առաքելություն կունենան՝ ծայրահեղականությունն արմատախիլ անելը»:
«Սա տարբեր կրոնի, դավանանքի կամ քաղաքակրթության պայքար չէ,- նշել է Թրամփը:- Սա պայքար է հանցագործների դեմ, որոնք ցանկանում են կործանել մարդկային կյանքը»:
«Ամեն անգամ, երբ ահաբեկիչը սպանում է անմեղ մարդուն՝ կեղծորեն Աստծուն վկայակոչելով, դա պետք է ցանկացած հավատացյալի համար վիրավորանք լինի»,- հայտարարել է ԱՄՆ նախագահը:
«Լավագույն ապագան հնարավոր է միայն այն ժամանակ, երբ մեր ժողովուրդները վտարեն ահաբեկիչներին և բոլոր ծայրահեղականներին: Վտարեք նրանց ձեր աղոթքի տներից: Վտարեք ձեր համայնքներից», - շեշտել է Թրամփը:
«Ամերիկան պատրաստ է ձեզ թև ու թիկունք լինել: Եթե մենք միասնական լինենք, ապա երբեք չենք պարտվի»,- եզրափակել է Միացյալ Նահանգների առաջնորդը:










