Անունները ավագ որդիներս են որոշել. նորածին եռյակի մայր (տեսանյութ)
Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտում մայիսի 12-ին եռյակ է ծնվել՝ 2 աղջիկ, 1 տղա: Երեխաները լույս աշխարհ են եկել կեսարյան հատումով: Ծնունդից տասը օր անց երեք երեխաների վիճակը կայուն է, քաշի ավելացում է նկատվում:
Այս մասին Tert.am-ի հետ զրույցում ասաց Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտի տնօրեն Ռազմիկ Աբրահամյանը:
«33-ամյա Հերմինե Տերտերյանը մեր ինստիտուտի ամբուլատոր բաժնում մայիսի 9-ին եղել է պառկած իր հերթական պրոֆիլակտիկ կանխարգելիչ բուժումը ստանալու համար, սակայն ամսի 12-ից նրա մոտ սկսեցին ծննդաբերական գործողություններ, և բնականաբար կատարեցինք կեսարյան հատում: Կեսարյան հատումն անցավ մեր սրտով, առանց բարդությունների, և ծնվեց երեք երեխա: Առաջինը՝ 1350 գրամ, 35 սմ հասակով, երկրորդը՝1500 գրամ, 37 սմ հասակով, երրորդը՝ տղան՝ 1720 գրամ քաշով և 41 սմ հասակով»,-ասաց Աբրահամյանը:
Ռազմիկ Աբրահամյանը հայտնեց, որ հղիությունը եղել է բնական ճանապարհով և եղել է նրա երրորդ հղիությունը:
«Այսօր նորածինների վիճակը կայուն է, արդեն ունենք քաշի ավելացում, նորմայից շեղումներ չունեն, երբ ավելի կայուն ու ստաբիլ կլինի, նրանց կնախապատրաստենք դուրս գրման»,-ասաց Աբրահամյանը:
Ինչ վերաբերում է հանրապետությունում հաճախ եռյակների լույս աշխարհ գալուն, ՀՀ ԱՆ գլխավոր մանկաբարձ-գինեկոլոգն ասաց, որ նման ծնունդներ հաճախ են հանդիպում. «Եռյակները բավականին հաճախակի են լինում, քառյակները՝ ավելի քիչ, հնգյակը՝ հազվադեպ: Եռյակները մեր հանրապետությունում բավականին շատ են, ինչը ուրախալի է, որովհետև ամեն մի երեխան խիստ կարևոր է, իսկ մեր ազգի հարստությունը շատ և առողջ նորածիններ ունենալն է»:
Tert.am-ի հետ զրույցում երեխաների մայրը պատմեց և իրեն անչափ երջանիկ է զգում. «Իրականում ես չգիտեի, որ եռյակի եմ սպասում: Մենք երկու տղա ունենք, և ցանկանում էինք նաև աղջիկ ունենալ: Իմացա, որ եռյակի եմ սպասում և այժմ շատ ուրախ եմ»:
Հերմինե Տերտերյանը պատմեց, որ երեխաների օրորոցները դեռ պատրաստ չեն, բացի այդ, արհեստական կերի խնդիր ունի: Նորածինների մայրը նաև հայտնեց, որ ինքը չի աշխատում. «Թալինում ենք ապրում, ամուսինս զինվորական է: Բացի նորածիններս, նաև երկու որդի ունեմ՝ Ավետն ու Գեղամը, ովքեր էլ որոշել են նորածինների անունները՝ Անի, Աննա, Մհեր»:
Առավել մանրամասն՝ տեսանյութում:










