Մեծ Բրիտանիայում հաջորդ ահաբեկչությունը կարող է անխուսափելի լինել. Թերեզա Մեյ
Մեծ Բրիտանիայում հարձակման հավանականությունը ոչ միայն պարզապես բարձր է մնում, այլև հաջորդ հարձակումը կարող է անխուսափելի լինել: Այդ մասին ասել է Մեծ Բրիտանիայի վարչապետ Թերեզա Մեյը՝ հայտարարելով երկրում ահաբեկչական վտանգի մակարդակը «լուրջ»-ից առավելագույն «կրիտիկական»-ի բարձրացնելու մասին, ինչը նշանակում է ահաբեկչության անմիջական սպառնալիք, հայտնում է BBC-ն:
Ահաբեկչական սպառնալիքի վտանգը որոշում է ահաբեկչության վերլուծության միավորված կենտրոնը, որի մեջ մտնում են փորձագետներ ոստիկանությունից, հետախուզական ծառայություններից և այլ ուժային կառույցներից:
«Նրանց գնահատմամբ՝ հարձակման հավանականությունը ոչ միայն բարձր է մնում, այլև հաջորդ հարձակումը կարող է անխուսափելի լինել»,- հայտարարել է Բրիտանիայի վարչապետը:
Մեյի խոսքով՝ չի կարելի բացառել հնարավորությունը, որ երկրում կա Մանչեսթերում իրականացված ահաբեկչությանը ներգրավված մարդկանց մի ամբողջ խումբ:
Վարչապետը նաև խոստացել է, որ բրիտանական քաղաքների փողոցների պարեկությանն այժմ կմիանա բանակը: Լրացուցիչ կհսկվեն ենթակառուցվածքների բոլոր առանցքային օբյեկտները և զբոսաշրջային տեսարժան վայրերը:
Հիշեցնենք, որ մայիսի 22-ի երեկոյան բրիտանական Մանչեսթեր քաղաքի մարզահամերգային համալիրում, որտեղ անցնում էր ամերիկացի երգչուհի Արիանա Գրանդեի համերգը, խոշոր ահաբեկչություն է տեղի ունեցել, որի հետևանքով զոհվել է 22, վիրավորվել 59 մարդ։
Կատարվածի պատասխանատվությունը ստանձնել է «Իսլամական պետությունը»։










