Թուրքիան վետո է կիրառել Ավստրիայի հետ ՆԱՏՕ-ի համագործակցության հարցում

10:55 • 24.05.17

Թուրքիան վետո է կիրառել Ավստրիայի հետ ՆԱՏՕ-ի համագործակցության հարցում, ինչի հետևանքով արգելափակվելու է ևս չորս տասնյակ երկրի հետ դաշինքի համագործակցությունը, գրում է BBC-ի ռուսական ծառայությունը:


Որպես պատասխան քայլ՝ Հյուսիսատլանտյան դաշինքի անդամները որոշում են կայացրել փոխել պետությունների միջև համագործակցության գործընթացը՝ թույլ տալով երկկողմ գործընկերությունը:


ՆԱՏՕ-ի ներկայացուցիչը հայտարարել է, որ համագործակցությունը կշարունակվի՝ չնայած թուրքական վետոյին:


Ավստրիան ՆԱՏՕ-ի անդամ չէ, սակայն սերտորեն համագործակցում է ռազմական դաշինքի հետ, օրինակ՝ 400 ավստրիացի զինծառայող տեղակայված է Կոսովոյում:


Վետո կիրառելու մասին թուրքական իշխանությունների որոշման պատճառն Ավստրիայի փորձերն են՝ խոչընդոտել Եվրամիությանը Թուրքիայի անդամակցությանը:


Ավստրիան դատապարտել է այդ որոշումը՝ այն անվանելով անպատասխանատու: