Չինաստանում ուղևորատար ինքնաթիռը չվերթ է իրականացրել շասսիից կախված պայուսակով (լուսանկար)
Չինական Air China ավիաընկերության ինքնաթիռը չվերթ է իրականացրել շասսիից կախված պայուսակով: Այս մասին հայտնում է Ecns.cn պորտալը:
Աղբյուրի հաղորդմամբ՝ միջադեպը տեղի է ունեցել մայիսի 22-ին: Ինքնաթիռը Պեկինի Շոուդու միջազգային օդանավակայանից հասել է Լանչժոու քաղաքի օդանավակայան:
Ինքնաթիռների սպասարկմամբ զբաղվող Ameco ընկերության աշխատակիցները գործիքներով պայուսակը կախել են շասսիից՝ այն անձրևից պաշտպանելու համար, սակայն աշխատանքներն ավարտելուց հետո մոռացել են վերցնել այն:
Նշվում է, որ դրանից հետո ինքնաթիռը թռել և բարեհաջող վայրէջք է իրականացրել Լանչժոու քաղաքի օդանավակայանում: Հայտնի է, որ Լանչժոուի և Պեկինի միջև հեռավորությունը կազմում է մոտ 1,5 հազար կիլոմետր: Չվերթը տևել է մոտ 2,5 ժամ:
Չինաստանի ավիացիոն փորձագետները նշում են, որ պայուսակը կարող էր լուրջ խնդիրների պատճառ դառնալ: Ameco-ն ընդունել է, որ աշխատակիցները խախտել են անվտանգության տեխնիկայի կանոնները, և խոստացել պարզել միջադեպի հանգամանքները:











