Հայ-ամերիկյան թանգարանի, Ցեղասպանության թեման դպրոցներում ներառելու ծրագրի ֆինանսավորումը ներառվել է Կալիֆորնիայի սենատի բյուջեի օրինագծում

ԱՄՆ Կալիֆորնիայի նահանգային սենատի բարձրաստիճան անդամ Էնթոնի Պորտանտինոն հայտարարել է, որ  Հայոց ցեղասպանության թեման հանրակրթական դպրոցների ուսումնական ծրագրում ներառելու, այդ թեմայով ուսուցիչների վերապատրաստում կազմակերպելու, ինչպես նաև Գլենդեյլում Հայ-ամերիկյան թանգարանի ֆինանսավորման հարցերը ներառվել են նահանգային բյուջեի մասին օրինագծի վերջնական տարբերակում:

Ինչպես հայտնում է Asbarez-ը, օրինագծի վերաբերյալ քվեարկությունը կայանալու է հունիսի 15-ին:

Աղբյուրը մանրամասնում է, որ սենատոր Պորտանտինոյի անձնական ջանքերի շնորհիվ Հայ-ամերիկյան թանգարանին առաջարկվել է տրամադրել 4 մլն դոլար: Բացի այդ, Պորտանտինոն խնդրել է առաջիկա 3 տարվա ընթացքում թանգարանին հավելյալ 3 մլն դոլար հատկացնել:

Որպես Սենատի կրթության հարցերով ենթահանձնաժողովի նախագահ՝ Պորտանտինոն առաջարկել է 10 մլն դոլար հատկացնել ծրագրին, որը ենթադրում է Հայոց ցեղասպանության թեմայի ներառում հանրակրթական դպրոցների ուսումնական ծրագրում, այդ թեմայով ուսուցիչների վերապատրաստման կազմակերպում: