Նոր «Տրանսֆորմերներ»-ը ցածր ցուցանիշ է գրանցել ամերիկյան կինովարձույթում

Հոլիվուդյան «Տրանսֆորմերներ. վերջին ասպետը» ֆիլմն ամերիկյան կինովարձույթում հայտնվելու առաջին հանգստյան օրերին ցածր ցուցանիշ է գրանցել:

Ինչպես հայտնում է Variety-ն, նոր ֆիլմը, «Տրանսֆորմերներ»-ի նախորդ մասերի համեմատ, ամենաքիչ գումարն է հավաքել ամերիկյան կինոթատրոններում հայտնվելու առաջին հանգստյան օրերին:

Աղբյուրը մանրամասնում է, որ  կինոնկարը ներքին շուկայում հավաքել է 69.1 մլն դոլար:

«Իհարկե, մենք կցանկանայինք ներքին շուկայում ավելի մեծ թվեր տեսնել, բայց մերը գլոբալ բիզնես է: Նշանակություն ունեն համաշխարհային կինովարձույթի ցուցանիշները: Այս ֆիլմը նախատեսված է միջազգային հեռուստալսարանի համար»,- մեկնաբանել է Paramount կինոստուդիայի ներկայացուցիչ Մեգան Կոլիգանը:

Աղբյուրը մանրամասնում է, որ ամբողջ աշխարհում անցած հանգստյան օրերին ֆիլմը հավաքել է 196.2 մլն դոլար, որից 123 մլն-ը՝ Չինաստանում:

Նշվում է, որ Մայքլ Բեյի ֆիլմի բյուջեն 217 մլն դոլար է:

«Տրանսֆորմերների» առաջին մասը նկարահանվել է 2007 թվականին և  ամերիկյան կինովարձույթում հայտնվելու առաջին հանգստյան օրերին հավաքել 70.5 մլն դոլար։