Էլթոն Ջոնը չեղարկել է համերգը Գերմանիայում՝ G20-ի գագաթնաժողովի պատճառով

Բրիտանացի երաժիշտ Էլթոն Ջոնը G20 գագաթնաժողովի պատճառով չեղարկել է իր համերգը Գերմանիայում: Այս մասին հայտնում է Focus-ը՝ հղում անելով համերգի կազմակերպիչներին: 

Հայտնի է, որ ելույթը պետք է կայանար հուլիսի 8-ին Համբուրգում, սակայն երաժշտին չեն տվել շրջայցային ինքնաթիռի վայրէջքի թույլտվություն: 

Համերգի կազմակերպիչների խոսքով՝ սա բացատրվում է G20-ի գագաթնաժողովի հետ կապված սահմանափակումներով: 

Էլթոն Ջոնի մենեջերները հույս են ունեցել, որ համերգն անցկացնելու հնարավորություն կլինի, սակայն չափազանց մեծ անորոշության պատճառով պետք էր որոշում ընդունել: 

Ենթադրվում է, որ ելույթը կկայանա 2017 թվականի դեկտեմբերի հինգին: 

Հիշեցնենք, որ «Մեծ քսանյակի» (G20) գագաթնաժողովն այս տարի կանցկացվի հուլիսի 7-8-ը՝ գերմանական Համբուրգ քաղաքում: 

Ինչպես ավելի վաղ հայտնել է Tert.am-ը, գերմանական ոստիկանությունը ջրցաններ է կիրառել Համբուրգում անցկացվելիք G20 գագաթնաժողովի հակառակորդների գիշերային ցույցերը ցրելու համար: