Կարեն Շահնազարովը նշում է ծննդյան 65-ամյակը. ռեժիսորին շնորհավորել է ՌԴ վարչապետը (լուսանկարներ)

Ռուսաստանի Դաշնության վարչապետ Դմիտրի Մեդվեդևը ծննդյան 65-ամյակի առթիվ շնորհավորել է ռուսաստանաբնակ հայազգի ռեժիսոր Կարեն Շահնազարովին:

Ինչպես նշում է life.ru-ն, վարչապետն ընդգծել է, որ Շահնազարովի ղեկավարության օրոք «Մոսֆիլմ»-ը դարձել է  Ռուսաստանի կինոարդյունաբերության խոշորագույն ստեղծագործական կոնցեռներից մեկը:

«Ձեզանում համադրվում է ռեժիսորի ու ղեկավարի վառ արտահայտված տաղանդը, ինչն էլ օգնում է Ձեզ գլխավորել հանրահայտ «Մոսֆիլմ»-ը: Այսօր Ձեր շնորհիվ այն հանդիսանում է ռուսական կինոարդյունաբերության խոշորագույն ստեղծագործական կոնցեռներից մեկը»,-ասվում է Մեդվեդևի՝ կառավարության կայքում հրապարակված շնորհավորական ուղերձում:

Ինչպես ավելի վաղ հայտնել էր Tert.am-ը, Հայաստանի Հանրապետության նախագահ Սերժ Սարգսյանը ևս շնորհավորական ուղերձ է հղել Կարեն Շահնազարովին ծննդյան 65-րդ տարեդարձի առթիվ՝ մաղթելով հոբելյարին քաջառողջություն և նորանոր ստեղծագործական նվաճումներ։

Նշենք, որ բեմադրող-ռեժիսոր, սցենարիստ, պրոդյուսեր, ինչպես նաև «Մոսֆիլմ» կինոկոնցեռնի ղեկավար Կարեն Շահնազարովը ծնվել է 1952թ. հուլիսի 8-ին: Նրան լայն ճանաչում է բերել «Մենք ջազից ենք» երաժշտական ֆիլմը, որն էկրան է բարձրացել 1983թ.: Նրա նկարահանած ֆիլմերն արժանացել են ավելի քան 50 միջազգային ու ազգային մրցանակի, 2 անգամ մասնակցել են Կաննի կինոփառատոնին և 2 անգամ ներկայացվել հեղինակավոր «Օսկար» մրցանակի:

Կարեն Շահնազարովը՝ հոր հետ