Եղանակն՝ այսօր
2018թ-ին պետք է ստեղծվի Բարձրագույն դատական խորհուրդ, մինչդեռ բյուջեում որևէ տող չկա այդ մասին. Հրայր Թովմասյան
«ՀՀ 2018թ. պետական բյուջեի մասին» ՀՀ օրենքի նախագծի քննարկմանը ՀՀ ֆինանսների նախարարի առաջին տեղակալ Ատոմ Ջանջուղազյանին հարց ուղղեց ՀՀԿ պատգամավոր Հրայր Թովմասյանը: Ըստ նրա` եկող տարի պետք է ստեղծվի Բարձրագույն դատական խորհուրդ, մինչդեռ բյուջեում որևէ տող չկա այդ մասին:
«Դա ենթադրում է առանձին աշխատակազմ ու աշխատողների աշխատավարձ, և արդյոք պե՞տք է ենթադրել, որ պահուստային ֆոնդից է արվելու, այսինքն՝ պլանավորված էլ չի»,-հարցրեց Թովմասյանը:
Ատոմ Ջանջուղազյանը պատասխանեց, որ այս պահին չի հիշում նախատեսվում է, թե ոչ, բայց կարող է ասել, որ եթե օրենսդրության պահանջ լիներ, վստահաբար նախատեսված կլիներ:
«Եթե այս պահին օրենսդրությունը նախատեսեր այսպիսի մարմին, կնախատեսեինք։ Օրինակ` հիմա էթիկայի հանձնաժողովի համար նախատեսել ենք հատկացումներ, մենք օրենսդրությամբ ենք առաջնորդվում»,-ասաց նա` հավելելով. «Իրավացի եք, եթե բյուջեի կատաման մասին պահանջ լինի, ապա այդ մարմնին կհատկացվի պահուստային ֆոնդից»:
Հրայր Թովմասյանը նկատեց, թե Սահմանադրությամբ է նախատեսվում, որ Բարձրագույն դատական խորհուրդը ձևավորվի: «Այն ձևավորվելու է Նախագահի լիազորությունների ավարտից մեկ ամիս առաջ և սկսելու է գործել Նախագահի լիազորություններից մեկ ամիս հետո, այսինքն՝ Սահմանադրությունն է այդ մարմինը նախատեսել»,-ասաց նա:
Studio One