Տիկնա՛յք, դուք լուռ եք, ձեզնից որևէ մեկը չի անդրադարձել Սոնա Մնացականյանի դեպքին. Արեգա Հովսեփյան

Ես չեմ կարող անտարբեր լինել, երբ, օրինակ, նույն այս նախագիծը ներկայացնող տիկնայք որևէ ձևով, իրենց խոսքում չեն անդրադարձել Սոնա Մնացականյանի դեպքին, Ազգային ժողովում ասել է «Ուժեղ Հայաստան» խմբակցության պատգամավոր Արեգա Հովսեփյանը՝ դիմելով «Ընտանեկան և կենցաղային բռնության կանխարգելման ու ընտանեկան և կենցաղային բռնության ենթարկված անձանց պաշտպանության մասին» օրենքում փոփոխություններ կատարելու նախագիծը ներկայացնողներին:

«Սոնա Մնացականյանը, ով իր սրտի տակ բալիկի էր կրում, փաստացի իր կյանքից զրկվեց՝ ավտոշարասյան անհավանական արագության պատճառով, որում գտնվում էր վարչապետը: Իրական մեղավորները պատասխանատվության չեն ենթարկվում:

Տիկնա՛յք, դուք լուռ եք։ Ես ձեզնից որևէ հետևողականություն չեմ տեսել այս հարցի նկատմամբ»-նշել է նա: