Նիկոլ Քիդմանն «Օսկար»-ին կրել է մի քանի միլիոն դոլար արժողությամբ ադամանդյա զարդեր (լուսանկարներ)

Լոս Անջելեսում կայացել է «Օսկար-2018» կինոմրցանակաբաշխությունը, որը հոլիվուդյան աստղերի շրջանում ամենասպասված իրադարձությունն է և որին նրանք նախապատրաստվում են ամիսներ առաջ:

Հանդիսավոր կարմիր գորգի վրա մի քանի րոպե կանգնելու և անթերի տեսքով բոլորին հիացնելու համար աստղերն ամիսներ շարունակ բանակցում են նորաձևության տների ու ոսկերչական բրենդների հետ՝ «Օսկար»-ի կապակցությամբ ամենագեղեցիկ նմուշները կրելու հնարավորությունը ստանալու համար:

Ինչպես նշում է The Daily Mail-ը, դերասանուհի Նիկոլ Քիդմանի այս տարվա օսկարյան հայտնությունն աննկատ չի մնացել: Դրան նպաստել են ինչպես ճիշտ ընտրված Armani Privé մուգ կապույտ զգեստը, այնպես էլ նրբաճաշակ ադամանդյա զարդերը: Հիսունամյա օսկարակիր դերասանուհին կրել է մի քանի միլիոն դոլար արժողությամբ Harry Winston զարդեր, որոնք ընդհանուր կշռել են 84 կարատ:

Նրբակազմ ավստրալուհին կրել է 23.52 կարատանոց ականջօղեր, մատանիներ, ժամացույց և թևնոցներ:

Աղբյուրը նկատում է, որ սա առաջին անգամ չէ, երբ Քիդմանն «Օսկար»-ին է ներկայանում Harry Winston զարդերով: Օրինակ՝ 2015թ. նա մրցանակաբաշխությանն էր ներկայացել 7 մլն արժողությամբ զարդերով: