Մեծամորի մասին իտալացի լուսանկարչի ֆոտոշարքն անցել է Sony Awards-ի եզրափակիչ փուլ (լուսանկարներ)

Sony World Photography Awards հեղինակավոր միջազգային ֆոտոմրցույթի ժյուրին ընտրել է 2018 թվականի մրցույթի եզրափակիչ փուլ անցած մասնակիցներին. համապատասխան ցուցակը հրապարակվել է մրցույթի պաշտոնական կայքում:

Մրցույթի ժյուրին կազմել է երկու կարճ ցանկ՝ ներառելով մասնագիտական և սիրողական լուսանկարիչների, որոնցից յուրաքանչյուրում ներկայացվել է 10-ական անվանակարգ:

Պրոֆեսիոնալ լուսանկարիչների «Ժամանակակից խնդիրներ» անվանակարգում ներառվել է իտալացի լուսանկարիչ Ստեֆանո Մորելլիի Suspension ֆոտոշարքը, որը պատմում է Մեծամոր քաղաքի և ատոմակայանի հետևանքով առաջացած խնդիրների մասին:

2017 թվականին Ստեֆանո Մորելլին այցելել է Մեծամոր, լուսանկարել ու ներկայացրել հիմնականում ատոմակայանի աշխատակիցների և բնակիչների առօրյան:

2017 թվականի նոյեմբերին Մորելլիի ֆոտոշարքը հրապարակվել է The Washington Post-ում, որտեղ Մեծամորն անվանել են «կասկածների ու վախերի, աղքատության ու գոյատևման, կյանքի ու մահվան մեջտեղում կախված քաղաք»: