Լոնդոնը պատասխան կտա ռուս նախկին լրտես Սկրիպալի թունավորման առնչությամբ միջազգային հանրությանը մոլորեցնելու փորձի համար. Լավրով

15:12 • 14.03.18

Ռուսաստանը կպաշտպանի իր միջազգային իրավունքը, Լոնդոնը ստիպված կլինի պատասխան տալ միջազգային հանրությանը ռուսական հետախուզական վարչության նախկին աշխատակից Սերգեյ Սկրիպալի թունավորման գործի առնչությամբ մոլորեցնելու բացահայտ փորձի համար: Այդ մասին հայտարարել է ՌԴ արտգործնախարար Սերգեյ Լավրովն իր թուրք գործընկեր Մևլութ Չավուշօղլուի հետ համատեղ մամուլի ասուլիսի ժամանակ, հաղորդում է «ՌԻԱ Նովոստի»-ն:


«Առանց կոնկրետ փաստեր ներկայացնելու՝ Լոնդոնը ստիպված կլինի պատասխան տալ միջազգային հանրությանը կոպտորեն մոլորեցնելու բացահայտ փորձի համար»,- ընդգծել է Ռուսաստանի արտգործնախարարության ղեկավարը:


ՌԴ արտգործնախարարը հայտարարել է, որ Մոսկվան դեռ միայն հետընթաց է տեսնում Մեծ Բրիտանիայում ռուսական հետախուզական վարչության նախկին աշխատակից Սերգեյ Սկրիպալի շուրջ իրավիճակի կարգավորման գործընթացում:


«Կա հետընթաց, մենք առաջընթաց չենք տեսնում»,- հայտարարել է Լավրովը՝ պատասխանելով հարցին, թե արդյոք կա առաջընթաց թունավոր նյութի նմուշ ներկայացնելու մասին Մոսկվայի խնդրանքին ի պատասխան Լոնդոնի ձեռնարկած քայլերում:


«Մենք այդպես էլ չենք ստացել Լոդոնից ոչ մի պաշտոնական դիմում Սերգեյ Սկրիպալի և նրա դստեր թունավորման գործով»,- ասել է Լավրովը:


Ավելի վաղ Սերգեյ Լավրովը հայտարարել է, որ ռուսական կողմը չի պատասխանի «Սկրիպալի գործի» վերաբերյալ Լոնդոնի վերջնագրին, մինչև Մեծ Բրիտանիան չկատարի քիմիական զենքի արգելման մասին հռչակագրի շրջանակում ստանձնած պարտավորությունները և չապահովի նյութին հասանելիությունը, որով թունավորվել են ռուս նախկին սպա Սերգեյ Սկրիպալը և նրա դուստր Յուլյան:


Մարտի 12-ին Մեծ Բրիտանիայի վարչապետ Թերեզա Մեյը հայտարարել էր, որ Սկրիպալի թունավորմանը «մեծ հավանականությամբ» ներգրավված է Ռուսաստանը: Նա ՌԴ-ին ժամանակ էր տվել մինչև մարտի 13-ը միջադեպի առնչությամբ մանրամասն պարզաբանումներ տրամադրելու համար, հակառակ դեպքում՝ Մոսկվայի դեմ լուրջ քայլերի ձեռնարկում է նախատեսվում:


Հիշեցնենք, որ 66-ամյա նախկին լրտես Սկրիպալը և նրա դուստրը մարտի 4-ին նյարդապարալիտիկ գազի ազդեցության են ենթարկվել անգլիական Սոլսբերի քաղաքի առևտրի կենտրոններից մեկում և անգիտակից վիճակում տեղափոխվել հիվանդանոց։ Նրանք գտնվում են հիվանդանոցում ծայրահեղ ծանր վիճակում:


Սկրիպալը Ռուսաստանում 2006 թվականին դատապարտվել էր Մեծ Բրիտանիայի օգտին լրտեսելու համար, իսկ 2010 թվականին նրան ներում է շնորհվել երեք այլ ռուսների հետ: Ավելի ուշ նրանց փոխանակել են ԱՄՆ-ում ձերբակալված ռուս գործակալների հետ: Սկրիպալն ապաստան էր ստացել Մեծ Բրիտանիայում: