«Դիլիջան» ազգային պարկում 19 ծառի հատման դեպքի առթիվ հարուցվել է քրեական գործ, անտառապահը ձերբակալվել է. դատախազություն

14:11 • 28.03.18

ՀՀ Տավուշի մարզի դատախազության դատախազի ցուցումով ձերբակալվել է «Դիլիջան ազգային պարկ» ՊՈԱԿ-ի «Հաղարծին» տեղամաս մասնաճյուղի անտառապահը:

Այս մասին Tert.am-ի հետ զրույցում ասաց ՀՀ դատախազության հանրային կապերի բաժնի պետ Արևիկ Խաչատրյանը:

«ՀՀ ԲՆ «Դիլիջան ԱՊ» ՊՈԱԿ-ի «Հաղարծին» տեղամաս մասնաճյուղի թիվ 14 պահաբաժնի մի խումբ պաշտոնատար անձանց կողմից 2017թ. փետրվար-մարտ ամիսներին ծառայության նկատմամբ անբարեխիղճ վերաբերմունքի և իրենց պարտականությունները պատշաճ չկատարելու հետևանքով բնության հատուկ պահպանվող տարածք հանդիսացող, նշված պահաբաժնի «Մոթմոմանց թալա» կոչվող տարածքում դեռևս ինքնությունը չպարզված անձանց կողմից կատարվել է 18 հատ թաց, կանգուն և 1 հատ քամատապալ ծառերի ապօրինի հատում, որոնց հողով քողարկված կոճղերը հայտնաբերվել են 2018թ. մարտի 22-ին:

Նշված ծառերի ապօրինի հատմամբ պետությանը պատճառվել է 8.958  մլն դրամի գույքային վնաս»,-ասաց Արևիկ Խաչատրյանը:

Նա հայտնեց, որ նկատի ունենալով, որ նյութերում առկա են պաշտոնեական անփութության և ծառերի ապօրինի հատմամբ առանձնապես խոշոր վնաս պատճառելու հանցագործությունների առերևույթ հատկանիշեր մատնանշող բավարար տվյալներ, դեպքի առթիվ ՀՀ ոստիկանության Տավուշի մարզային վարչության Դիլիջանի բաժնում հարուցվել է քրեական գործ ՀՀ քրեական օրենսգրքի 315-րդ հոդվածի 2-րդ մասով և 296-րդ հոդվածի 3-րդ մասով:

Դատախազության հանրային կապերի բաժնից հայտնեցին, որ գործով նախաքննության օրինականության նկատմամբ հսկողություն իրականացնող դատախազի ցուցումով «Դիլիջան ԱՊ» ՊՈԱԿ-ի «Հաղարծին» տեղամաս մասնաճյուղի անմիջական պատասխանատու անտառապահը նախաքննական մարմնի կողմից ձերբակալվել է:

Ձեռնարկվում են անհրաժեշտ բոլոր քննչական և դատավարական այլ գործողությունները՝ առերևույթ հանցագործության մեջ ներգրավված բոլոր անձանց և դեպքի հանգամանքները լիարժեք պարզելու ուղղությամբ: