Վարորդական իրավունքներից զրկված Մառա Բաղդասարյանին ոստիկանները Մոսկվայում դարձյալ նկատել են ղեկին

23:41 • 31.03.18

Մոսկվայում պետավտոտեսչության աշխատակիցները ձերբակալել են վարորդական իրավունքներից զրկված 24-ամյա սկանդալային սթրիթռեյսեր Մառա Բաղդասարյանին:

Ինչպես հայտնում է РИА Новости-ն՝ ՌԴ ՆԳՆ մայրաքաղաքային վարչությունից տեղեկացրել են, որ Բաղդասարյանի Merсedes-ը կանգնեցրել են Լենինգրադյան պողոտայում գիշերվա ժամը երեքին:

Վերջինս ճանապարհային ոստիկանության աշխատակիցներին չի ներկայացրել վարորդական իրավունքը, իսկ տվյալների բազայով ստուգումներ անցկացնելուն պես տեսուչները պարզել են, որ նա ընհանրապես ավտոմեքենա վարելու իրավունք չունի:

Մառա Բաղդասարյանը Gelandewagen մակնիշի մեքենայով մոսկովյան փողոցներում մրցավազքեր իրականացնող սթրիթռեյսերի գործով անցնող անձանցից մեկն էր: Դատավարությունից հետո նրան բազմիցս ձերբակալել են ճանապարհային երթևեկության կանոնները խախտելու համար:

2017-ի մարտին նրան անորոշ ժամանակով զրկել են վարորդական իրավունքից, քանի որ վթարներից մեկի ժամանակ ստացած գանգուղեղային վնասվածքից հետո նա հաճախ էր նյարդաբանի դիմում, և բժիշկները նրա մոտ էպիլեպսիա էին ախտորոշել: