Եվրոպայից մինչև Մերձավոր Արևելք. հայտնի հայերին նվիրված հուշարձաններ, որոնք կանգնեցված են աշխարհի տարբեր անկյուններում (լուսանկարներ)

Աշխարհի տարբեր անկյուններում կան բազմաթիվ հուշարձաններ ու քանդակներ՝ նվիրված անվանի հայորդիներին, որոնք զգալի ավանդ ունեն ոչ միայն Հայաստանի, այլև տարբեր երկրների պատմություններում: Եվրոպայից մինչև Մերձավոր Արևելք կանգնեցված հուշարձանները նաև բարեկամության ու հայ ժողովրդի, նրա մշակույթի նկատմամբ հարգանքի նշան են:

Rusarminfo.ru կայքն ուշագրավ ֆոտոշարքով ներկայացրել է 5 հուշարձան, որոնք կանգնեցվել են տարբեր քաղաքներում՝ ի պատիվ անվանի հայերի:

Գրիգոր Լուսավորչի արձանը (Վատիկան)

Սրբի մարմարե քանդակն ունի 5.7 մ բարձրություն ու կշռում է ավելի քան 26 տոննա: Քանդակի հեղինակը ֆրանսահայ քանդակագործ Խաչիկ Ղազանչյանն է: Այն  առաջին անգամ ներկայացվել է 2005թ.՝ Հռոմի պապ Հովհաննես Պողոս 2-րդի կողմից:

Կոմիտասի արձանը (Փարիզ)

Վարդապետի արձանի բացումը տեղի է ունեցել 2003թ.՝ Ֆրանսիայի կողմից Հայոց ցեղասպանության պաշտոնական ճանաչումից 2 տարի անց: Չորս մետրանոց բրոնզե արձանի հեղինակը Դավիթ Երևանցին է:

Արամ Խաչատրյանի արձանը (Մոսկվա)

Տաղանդաշատ կոմպոզիտորի արձանի բացումը տեղի է ունեցել 2006թ.: Բրոնզե արձանը, որի հեղինակը Գեորգի Ֆրանգուլյանն ու Իգոր Վոսկրեսենսկին են, գտնվում է կոմպոզիտորի մոսկովյան բնակարանից ոչ հեռու:

Նուբար փաշայի արձանը (Ալեքսանդրիա)

Եգիպտոսի առաջին վարչապետ, ծագումով հայ Նուբար փաշայի (Նուբար Մելիքյան) արձանը կանգնեցված է Ալեքսանդրիա քաղաքի Օպերայի ազգային թատրոնի կողքին: Հայտնի է, որ Նուբար փաշան 19-րդ դարի վերջին 3 անգամ ստանձնել է Եգիպտոսի վարչապետի պաշտոնը:

Զորավար Անդրանիկի հուշարձանը (Վառնա)

Բուլղարական Վառնա քաղաքի իշխանությունների ու տեղի հայ համայնքի նախաձեռնությամբ 2011թ. բացվել է զորավար Անդրանիկ Օզանյանի՝ Հայաստանի և Բուլղարիայի ազգային հերոսի հուշարձանը, որը, ի դեպ, տեղադրված է նրա անունով կնքված հրապարակում: