Մարգո Ռոբին՝ Շերոն Թեյթի դերում. Լոս Անջելեսում ֆիլմի նկարահանման հրապարակից նոր լուսանկարներ են հրապարակվել (լուսանկարներ, տեսանյութ)

Բրիտանական Daily Mail պարբերականը նոր լուսանկարներ է հրապարակել «Մի անգամ Հոլիվուդում» ֆիլմի նկարահանման հրապարակից, որի գլխավոր հերոսուհին 28-ամյա ավստրալացի դերասանուհի Մարգո Ռոբին է:

Նկարահանումներն ընթանում են Լոս Անջելեսում: Քվենթին Տարանտինոյի ֆիլմում Ռոբին մարմնավորում է ամերիկացի դերասանուհի և մոդել Շերոն Թեյթին: Լուսանկարներում նա պատկերված է 1960-ականների ոճով հագնված՝ կրում է բարձր օձիքով սև վերնաշապիկ, սպիտակ կարճ կիսաշրջազգեստ ու սպիտակ երկարաճիտ կոշիկ:

Ավստրալացի դերասանուհին դեռ օգոստոսին իր Instagram-ի էջում հրապարակել էր առաջին լուսանկարը Շերոն Թեյթի կերպարով:

Ռոբիի մասնակցությունը ֆիլմում հաստատվել էր մայիսին: Դերասանուհու խոսքով՝ Տարանտինոյի հետ աշխատելն իր հին երազանքներից մեկն է:

Հայտնի է, որ ֆիլմի գործողությունները տեղի են ունենում 1969թ. Լոս Անջելեսում կատարվող սարսափելի սպանությունների ֆոնին, երբ քաղաքն ահաբեկում էր Չարլզ Մենսոնի «Ընտանիք» աղանդը: Դրանում ներկայացվելու են 20-րդ դարի ամենահայտնի հանցագործներից մեկի՝ Չարլզ Մենսոնի հետևորդների իրականացրած սպանությունները:

Ֆիլմում Լեոնարդո Դի Կապրիոն մարմնավորում է Ռիք Դալթոնին, իսկ Բրեդ Փիթը՝ Քլիֆ Բութին: Ֆիլմում նկարահանվող աստղային կազմում ընդգրկվել են նաև Քուրտ Ռասելը, Ալ Պաչինոն, Թիմ Ռոթը և ուրիշներ:

Ֆիլմի պրեմիերան կկայանա 2019թ. օգոստոսի 9-ին՝ Մենսոնի հետևորդների կողմից սպանված դերասանուհի Շերոն Թեյթի մահվան 50-րդ տարելիցի օրը: