Ավելի քան 10 մլն այցելու. Լուվրի թանգարանը նոր ռեկորդներ է սահմանել

Փարիզի Լուվր թանգարանը 2018 թվականին 10,2 մլն մարդ է այցելել: Այդ ցուցանիշը 25 տոկոսով ավելին է 2017-ին գրանցված տվյալների համեմատ:

Ինչպես փոխանցում է Rg.ru-ն, 2018-ին գերազանցվել է 2012-ին սահմանված ռեկորդը, երբ թանգարան էր այցելել 9,7 մլն մարդ: Ի դեպ, այն ժամանակ Ռաֆայելի և Լեոնարդո դա Վինչիի ստեղծագործական կյանքին նվիրված ցուցադրություններ էին բացվել:

Լուվրի թանգարանի տնօրեն Ժան Լյուկ Մարտինեզի խոսքով՝ անցյալ տարի թանգարանների պատմության մեջ առաջին անգամ այցելուների թիվը գերազանցել է 10 միլիոնը:

Նրա կարծիքով՝ ռեկորդ սահմանել հաջողվել է Փարիզում միջազգային տուրիզմի վերականգնման շնորհիվ:

Ավելի վաղ ֆրանսիական մայրաքաղաքում զբոսաշրջային այցելությունների թիվը կրճատվել էր մի շարք ահաբեկչություններից հետո:

2018-ին Լուվրը մեծ թվով այցելուներ է ունեցել ԱՄՆ-ից, Չինաստանից, Իսպանիայից, Գերմանիայից, Իտալիայից, Մեծ Բրիտանիայից և Բրազիլիայից: Այցելուների թվում 2,5 միլիոնը Ֆրանսիայի քաղաքացիներն են: