Եղանակն՝ այսօր
Թուրք գիտնականը պնդում է, որ Թուրքիայից գողացված որոշ պատմական իրեր՝ այդ թվում հայկական կաթոլիկ եկեղեցուն պատկանող, գտնվել են Լոնդոնում
Թուրքիայում գործող Սուլեյման Դեմիրելի անվան համալսարանի դասախոս Հայալ Գյուլեչը հայտարարել է, որ երկրի տարածքում գողացված մի շարք պատմական իրեր այժմ գտնվում են Լոնդոնի Վիկտորիայի և Ալբերտի թանգարանում, դրանց թվում են նաև Ստամբուլի հայկական կաթոլիկ եկեղեցուց գողացված որոշ իրեր:
Ինչպես հաղորդում է arkeolojikhaber.com-ը, թուրք գիտնականը պնդել է, որ լոնդոնյան թանգարանում ցուցադրված են նաև Օսմանյան կայսրության գլխավոր պալատը հանդիսացած «Թոփքաթը» ամրոցից ու տարբեր մզկիթներից անհետացած իրեր, թուրք հնագետների կողմից Բուրսայում և Տիգրանակերտում պեղված գտածոներ:
Գյուլեչը որոշակի ապացույցներ է ներկայացրել կայքի խմբագրությանը՝ պնդելով, որ տարբեր թվականների մի շարք մզկիթներից անհետացած իրեր այժմ ցուցադրված են Վիկտորիայի և Ալբերտի թանգարանում:
Ենթադրվում է, որ անհայտ անձինք գողացել և վաճառել են պատմական նշանակություն ունեցող իրերը, այնուհետև դրանք մի քանի անգամ վերավաճառվել ու անհայտ ճանապարհով հասել են թանգարան:
Հայկական կաթոլիկ եկեղեցուց գողացված իրերի մասին գիտնականը մանրամասներ չի ներկայացրել: Հայտնի չէ նաև, թե նշված իրերը երբ են գողացվել հայկական եկեղեցուց:
Studio One