Բրեդ Փիթի ու Շառլիզ Թերոնի ենթադրյալ սիրավեպի մասին նոր մանրամասներ են ի հայտ եկել (լուսանկարներ)

Թեև հոլիվուդյան դերասաններ Բրեդ Փիթն ու Շառլիզ Թերոնը ո՛չ հաստատել, ո՛չ էլ հերքել են ենթադրյալ սիրավեպի մասին լուրը, լրատվամիջոցներն արդեն նոր մանրամասներ են պարզել նրանց հարաբերությունների վերաբերյալ:

Ինչպես նշում է Daily Mail-ը, ենթադրյալ զույգի մտերմությունը սկսվել է նախորդ տարի՝ գովազդային հոլովակում միասին նկարահանվելու արդյունքում:

Խոսքը Breitling ժամագործական բրենդի համար վեց ամիս առաջ տեղի ունեցած նկարահանման մասին է: Թերոնից ու Փիթից բացի՝ նկարահանումներին մասնակցել է դերասան Ադամ Դրայվերը:

Քաջատեղյակ աղբյուրի փոխանցմամբ՝ Փիթին ու Թերոնին դուր է գալիս միասին ժամանակ անցկացնելը: Նշվում է, որ նրանք դեկտեմբերին շատ ժամանակ են անցկացրել դերասանի՝ Կալիֆոռնիայի առանձնատանը:

Հետաքրքրական է, որ զույգին ծանոթացրել է Թերոնի նախկին ընկերը՝ դերասան Շոն Փենը:

Ավելի վաղ հայտնի էր դարձել, որ Թերոնը բարդ փոխհարաբերություններ ունի Փիթի նախկին կնոջ՝ դերասանուհի, պրոդյուսեր Անջելինա Ջոլիի հետ: Նշվում է, որ Թերոնի և Ջոլիի հակակրանքն ունի մի քանի տարվա պատմություն ու կապված է ֆիլմերում դերեր ստանալու հետ:

Լրատվամիջոցների փոխանցմամբ՝ կանայք իրար ուղղակի տանել չեն կարողանում: Հայտնի է, որ դերասանուհիների միջև թեժ պայքար է ընթացել տարբեր ֆիլմերում առաջարկված դերերի համար:

«Այս երկուսի միջև ատելությունը շատ վաղուց է սկսվել ու չի վերջանա հենց այնպես: Ռեժիսորներն իրենց հերթին թեժացնում են այդ պայքարը՝ ֆիլմերի սցենարներն ուղարկելով և՛ Ջոլիին, և՛ Թերոնին ու հետևելով՝ ինչպես է ընթանալու նրանց պայքարը»,-պատմել է քաջատեղյակ աղբյուրը: