Փարիզի խանութներից մեկում վերանորոգման ժամանակ XVII դարի հսկայական կտավ են հայտնաբերել

Ֆրանսիայի մայրաքաղաք Փարիզում գտնվող ամերիկյան Oscar de la Renta ապրանքանիշի հագուստի խանութում վերանորոգման ժամանակ բանվորները պատի պաստառի տակ XVII դարի հսկայական կտավ են հայտնաբերել, գրում է New York Times-ը:

Դեպքը տեղի է ունեցել 2 ամիս առաջ, սակայն այդ մասին հայտարարությունը տարածվել է միայն այժմ: Ենթադրվում է, որ կտավը պատին են սոսնձել և թաքցրել Երկրորդ համաշխարհային պատերազմի տարիներին:

Այժմ կտավի վրա վերականգնման աշխատանքներ են իրականացվում: Հայտնի չէ, թե ինչ միջոցով է կտավը սոսնձվել պատին, սակայն, մասնագետների եզրահանգմամբ, այն չի կարելի առանձնացնել պատից, այլապես ամբողջովին կփչանա, հետևաբար՝ խանութի դիզայնը կձևափոխվի՝ այն կտավին հարմարեցնելու համար:

Կտավը մակագրված է Առնուլդ դե Վուեի կողմից, որն աշխատել է նկարիչ Շառլ լե Բրյունի հետ: