Ազատ արձակված Քրիս Բրաունը մտադիր է հայց ներկայացնել իրեն խմբակային բռնաբարության համար մեղադրած մոդելի դեմ

Փարիզի ոստիկանությունն ազատ է արձակել խմբակային բռնաբարության համար մեղադրվող ամերիկյան հայտնի երգիչ Քրիս Բրաունին, որը հայտարարել է իրեն մեղադրած մոդելի դեմ դատական հայց ներկայացնելու մտադրության մասին:

Ինչպես նշում է Daily Mail-ը, 29-ամյա Բրաունի ֆրանսիացի փաստաբանը պատմել է, որ իր պաշտպանյալը հերքում է բոլոր մեղադրանքները:

«Այդ մեղադրանքը սուտ է, անհարգալից ու դեմ իմ բարոյական սկզբունքներին»,-հայտարարել է երգիչը:

Թեև Բրաունն ու երկու ընկերներն ազատ են արձակվել, սակայն գործը չի փակվել:

Աղբյուրը հիշեցնում է, որ 24-ամյա մոդելը (անունը հասկանալի պատճառներով չի նշվում) Բրաունին մեղադրել էր իր թիկնապահի ու ընկերոջ հետ Փարիզի հյուրանոցներից մեկում խմբակային բռնաբարություն կատարելու համար:

Տուժածի խոսքով՝ դեպքը տեղի է ունեցել հունվարի 16-ին: Ինքը Բրաունի հետ ծանոթացել է գիշերային ակումբում և նրա ու ընկերների հետ հյուրանոց գնալու առաջարկ ստացել: Սկզբում մերժել է, հետո համաձայնել՝ տեսնելով, որ այլ աղջիկներ էլ են գալիս:

«Համար մտնելուց առաջ թիկնապահը վերցրեց բոլորիս հեռախոսները, բայց դա մեզ չզարմացրեց, քանի որ Բրաունն աստղ է: Երբ հայտնվեցինք համարում, մեզ խմիչք առաջարկեցին, կար նաև կոկաին ու  մարիխուանա: Համարում մոտ 15 աղջիկ կար, հնչում էր բարձր երաժշտություն, մարդիկ անընդհատ ներս ու դուրս էին անում,  մի տեսակ քաոսային իրավիճակ էր»,-պատմել է տուժածը:

Նա մանրամասնել է, որ բռնաբարությունը տեղի է ունեցել լոգասենյակում ու տևել մոտ կես ժամ: Այնուհետև Բրաունը հեռացել է ու աղջկա կամքին հակառակ նրա մոտ ուղարկել ևս երկու տղամարդու: