Հիտլերի կտավներից 5-ն աճուրդի կհանվեն Նյուրեմբերգում (լուսանկարներ)

Ֆաշիստական Գերմանիայի առաջնորդ Ադոլֆ Հիտլերի կտավներից հինգը աճուրդի են հանվելու Նյուրեմբերգ քաղաքում, հայտնում է The Guardian-ը՝ մանրամասնելով, որ այդ տեղեկությունը հանրության լայն շերտերի վրդովմունքն է առաջացրել:

Նյուրեմբերգի քաղաքապետ Ուլրիխ Մալին դատապարտել է կտավներն աճուրդի հանելու որոշումը՝ նկատելով, որ դա «վատ ճաշակի դրսևորում» է:

Աղբյուրը մանրամասնում է, որ աճուրդի հանվելիք կտավներից մեկը, որում լեռնային լիճ է պատկերված, ունի 51 000 դոլար մեկնարկային գին:

Ի դեպ, կտավներից բացի վաճառքի է հանվելու նաև Հիտլերի ծղոտե բազկաթոռը՝ սվաստիկայի նշանով:

Նմուշների վաճառքով զբաղվելու է Weidler աճուրդի տունը, որը աճուրդի կազմակերպման համար պատահական չի ընտրել Նյուրեմբերգը. 1945թ. հենց այս քաղաքում են դատարանի առաջ կանգնել նացիստական ռեժիմի հանցագործները:

Գերմանիայում օրենքով արգելված է նացիստական խորհրդանիշների հանրային ցուցադրումը. բացառություններ են արվում միայն կրթական կամ պատմական համատեքստում: