Սիրո ինքնաթիռ. Բենքսիի անհետացած որմնանկարը վերադարձվել է  

Բրիտանացի նկարչ Բենքսին «Սիրո ինքնաթիռ» որմնանկարը պատկերել էր 2011-ին: Այն պատկերում է ինքնաթիռ, որը թռչելիս սրտի տեսքով հետագիծ է թողնում:  

Ինչպես հայտնում է Корреспондент-ը, 2016-ին թանգարան տեղափոխելու պատրվակով որմնանկարը մաքրել էին պատից: Այնուամենայնիվ, թանգարանն այդպես էլ չկառուցվեց, իսկ ստեղծագործությունն անհետացավ անհայտ ուղղությամբ:

Սակայն փետրվարի 14-ին այն կրկին հայտնվել է իր հին տեղում: Ի դեպ, ինքնաթիռից կախված ցուցանակ է պատկերվել՝ «Ես վերադարձել եմ» գրությամբ:

Որմնանկարի կողքին այլ գրություն էլ է տեղադրվել. «Փողոցային արվեստը նախատեսված չէ թանգարանային ցուցադրության համար: Այն նրա համար է, որ բոլորը տեսնեն և ոչ թե վերնախավը, այն էլ մուտքի վճարի դիմաց»:

Ենթադրվում է, որ գրաֆիտին անհետացել էր հենց հեղինակի ձեռքով: