Լուվրի կողմից մերժված կտավը կարող է ավելի քան 100 մլն դոլար արժենալ

Այս ամառ Ֆրանսիայում աճուրդի կհանվի կտավ, որն ամենայն հավանականությամբ պատկանում է իտալացի գեղանկարիչ Կարավաջոյի վրձնին և կարող է ավելի քան 100 մլն դոլար արժեք ունենալ:

Ինչպես նշում է The Guardian-ը, «Հուդիթը գլխատում է Հողոփեռնեսին» կտավը պատահմամբ հայտնաբերվել էր Ֆրանսիայում՝ 2014թ.: Արվեստի պատմության փորձագետների ու մասնագետների բազմաթիվ ուսումնասիրությունների արդյունքում ոմանք ենթադրել են, որ այն իսկապես նկարված է Կարավաջոյի կողմից: Այնուհանդերձ՝ վերջնական եզրակացություն չի տրվել:

Կտավը հայտնաբերել է աճուրդավար Մարկ Լաբարբեն՝ Թուլուզում գտնվող առանձնատան տանիքը կարգի բերելու արդյունքում: Երկու տարի կտավը գաղտնի է պահվել, իսկ 2016թ. Ֆրանսիայի կառավարությունն արգելք է սահմանել այն արտասահման տանելու վերաբերյալ:

Հեղինակավոր Լուվր թանգարանին առաջարկվել է գնել այն, սակայն թանգարանը հրաժարվել է:

Հայտնի է, որ կտավն աճուրդի է հանվելու հունիսի 27-ին՝ Թուլուզում: Ենթադրվում է, որ այն կվաճառվի ավելի քան 100 մլն դոլարով:

Կարավաջոյի աշխատանքներից մեզ է հասել 68 կտավ, որից չորսը մասնավոր հավաքածուներում են: