Մայքլ Ջեքսոնը պատմել է իր կողմից «բռնաբարված» դեռահասներից մեկին, որ կանանց հետ հարաբերություններն ու իր ամուսնությունը «պարզապես շոուի համար» են եղել. Daily Mail

Վերջերս թողարկված «Լքելով Նևերլենդը» սկանդալային վավերագրական ֆիլմում հերոսներից մեկը, որը հայտնի փոփ երգիչ Մայքլ Ջեքսոնին մեղադրել է փոքր տարիքում իր բռնաբարության համար, պատմել է, որ, Ջեքսոնի խոսքով, կանանց հետ նրա հարաբերությունները պարզապես շոուի համար են եղել, գրում է Daily Mail-ը:

Խոսքը Ջեյմս Սեյֆչաքի մասին է, որը, ըստ սկանդալային ֆիլմի, երգչի զոհերից է: Ջեյմսը պատմել է, թե ինչպես է Ջեքսոնը նրա ընտանիքին տուն նվիրել այն բանի համար, որպեսզի տղան 1993թ.-ին սեռական ոտնձգության համար մեղադրվող երգչի օգտին դատարանում վկայություն տա:

Երիտասարդի խոսքով՝ իրենց ծանոթության տարիներին Ջեքսոնը բազմիցս զգուշացրել է իրեն, որ ստիպված է կանանց հետ հարաբերություններ բեմադրել և մի օր անգամ ստիպված կլինի ամուսնանալ, սակայն «դա ոչինչ չի նշանակի, քանի որ այդ ամենն արվում է զուտ շոուի և նրա համար, որպեսզի մարդիկ այլ բան չմտածեն»:

Ջեյմսը նաև պնդում է, որ երգիչը հորդորել է իրեն թողնել դպրոցը՝ այդպիսով իրենից կախման մեջ թողնելով տղային ու նրա ծնողներին, որից հետո հետզհետե անհետացել է ընտանիքի կյանքից:

Հիշեցնենք, որ հունվարի վերջին թողարկված՝ Մայքլ Ջեքսոնի ենթադրյալ գլխավոր զոհերը հանդիսացող Ուեյթ Ռոբսոնի և Ջեյմս Սեյֆչակի պատմությունների հիման վրա նկարահանված «Նևերլենդը լքելով» (Leaving Neverland) փաստագրական ֆիլմի ցուցադրությունը մեծ իրարանցում էր առաջացրել: Ֆիլմի պրեմիերայից հետո հայտնվել էին ևս 11 ենթադրյալ զոհեր, որոնք փոփի արքայի կողմից ոտնձգությունների ենթարկված ժամանակ 7-14 տարեկան են եղել: