Իտալիայում եկեղեցի ներխուժած անձինք հայտնի կտավի փոխարեն դրա կրկնօրինակն են գողացել

Իտալիայի հյուսիսային Կաստելնուովո Մագրա քաղաքում անհայտ անձինք թալանել են Սբ Մարիամ Մագդաղենացի եկեղեցին՝ բնօրինակի փոխարեն գողանալով նիդեռլանդցի գեղանկարիչ Պիտեր Բրեյգել Կրտսերի կտավի կրկնօրինակը, գրում է Il Secolo XIX պարբերականը:

Դեպքը տեղի է ունեցել մարտի 13-ին: Գողերը եկեղեցի են ներխուժել, կոտրել պաշտպանիչ ապակին և, հափշտակելով մոտ մեկ դար առաջ եկեղեցուն նվիրաբերված «Խաչելություն» կտավի կրկնօրինակը, ավտոմեքենայով հեռացել:

Քաղաքապետ Դանիելե Մոնտեբելլոն հայտնել է պարբերականին, որ Իտալիայի իրավապահ մարմինները նախապես տեղեկացված են եղել ծրագրվող կողոպուտի մասին և արժեքավոր կտավը փոխարինել են կրկնօրինակով:  

Կողոպուտից հետո եկեղեցում անվտանգության տեսախցիկներ են տեղադրվել: Այժմ ոստիկանությունը փնտրում է գողերին: