ԱՄՆ-ում հոլիվուդյան արվեստի սրահից գողացել են Մերիլին Մոնրոյի ոչ մեծ արձանը

ԱՄՆ Լոս Անջելես քաղաքի Հոլիվուդ շրջանում հայտնի Փառքի ճեմուղուց ոչ հեռու գտնվող արվեստի երկհարկանի սրահից գողացել են ամերիկացի հայտնի կինոդերասանուհի և մոդել Մերիլին Մոնրոյի պողպատե արձանը, հաղորդում է Fox News-ը:

Արձանն այնտեղ տեղադրվել էր 25 տարի առաջ և պատկերում էր դերասանուհուն 1955թ.-ին նկարահանված  «Յոթ տարվա տենչը» (The Seven Year Old Itch) ֆիլմում:

Լոս Անջելեսի ոստիկանությունը հետաքննություն է սկսել արձանի անհետացման հանգամանքները պարզելու համար: Անվտանգության համակարգի տեսախցիկի արձանագրած կադրերում անհայտ անձը ցատկում է բարձրացած տեղից և ուսապարկով հեռանում, սակայն բուն գողության պահը չի տեսագրվել:

Մերիլին Մոնրոն մահացել է 36 տարեկանում, բարբիտուրատների չարաշահումից, Լոս Անջելեսի իր տանը։ Չնայած Մոնրոյի մահը համարվել է ինքնասպանություն, նրա մահվանից հետո առաջարկվել են մի շարք դավադրության տեսություններ։