ԱԺ-ում ԲԴԽ անդամի թեկնածության ժամանակ ես տվել եմ ոչ թե ինչ-որ մեկին դուրեկան կամ տհաճ պատասխաններ, այլ ներկայացրել եմ իմ տեսլականը. Աննա Մարգարյան

ԲԴԽ անդամ չընտրվելու պատճառների և մի շարք այլ հարցերի շուրջ Tert.am-ը զրուցել է ԱԺ մեծամասնության՝ «Իմ քայլը» խմբակցության կողմից ԲԴԽ անդամի թեկնածու առաջադրված և չընտրված իրավաբան Աննա Մարգարյանի հետ:

-Տիկին Մարգարյան, ճի՞շտ են տեղեկությունները, որ Դուք մի քանի անգամ մերժել եք ԲԴԽ անդամ դառնալ և երկար բանակցություններից հետո եք համաձայնել:

-Այո, նախկինում առաջարկներ եղել են, դա օբյեկտիվորեն հաստատված ճշմարտություն է, սկզբնական շրջանում չեմ համաձայնել, հետո համաձայնել եմ: Բայց սրա վրա չարժի ուղղակի կենտրոնանալ, սա էական բան չի փոխելու: Էականն այն է, որ այս պահին պետության կողմից ճիշտ քաղաքականություն ընտրելն ու վարելն է:

-Շատ տարբերակներ շրջանառվեցին, թե ինչու մեծամասնությունը, առաջադրելով Ձեր թեկնածությունը, չընտրեց. հարցերին Ձեր տված պատասխանները դուր չեկան նրանց, խորհրդարանն անլուրջ է և այլն, Դուք ի՞նչ եք կարծում, ինչո՞ւ առաջադրեցին ու չընտրեցին:  

-Ես չեմ կարող որևէ վարկածի վրա վերջնական կանգ առնել: Որպեսզի պատասխանեմ այս հարցին, պետք է ունենամ լիարժեք տեղեկատվություն, իսկ լիարժեք տեղեկատվություն չգիտեմ՝ այս պահին ումից կարելի է ստանալ: Ես ունեմ արձանագրված փաստ, և փաստը հետևյալն է՝ քվեարկությանը մասնակցել է 85 պատգամավոր, քվեարկության արդյունքներում ես ստացել եմ 66 կողմ ձայն: Պատասխանների հետ կապված որևէ հակադրություն, անհամաձայնություն չի եղել, համենայնդեպս բարձրաձայն չի հնչեցվել: Այն, ինչ կատարվել է դրա վերաբերյալ, բնականաբար, դատողություններ անել չեմ կարող և չեմ էլ պատրաստվում:

Եթե պատգամավորը տվել է դեմ ձայն՝ ղեկավարվելով իր ներքին համոզմունքով, ես միմիայն կհարգեմ նման պատգամավորին: Նա գտել է, որ իմ և իր տեսակետները, տեսլականները տարբեր են: Մնացած առումներով, եթե դրանք պայմանավորված են սուբյեկտիվ, անձնային, խմբային խնդիրներով և վերաբերում են առանձին խմբերի կամ անձանց շահերը գերակայելով հանրային, պետական շահի նկատմամբ, դա արդեն ընտրողի խնդիրն է: Դատողություններ անել, թե ով արեց, երբ արեց, ինչ պայմաններում արեց, ինձ, անկեղծ ասած, չի հետաքրքրում:

-Անլուրջ չէ՞ր խորհրդարանի մոտեցումը:

-Ես չեմ ասի անլուրջ, ես նման գնահատական չեմ տա, ես ընդամենը կասեմ, եթե ես կրկին այնտեղ գնամ, այ դա անլուրջ կլինի:

-Չե՞ք փոշմանել, որ որոշակի հարցերին տվել եք իշխանությանը ոչ դուրեկան պատասխաններ:

-Ո՛չ, երբեք: Ես տվել եմ ոչ թե ինչ-որ մեկին դուրեկան կամ տհաճ պատասխաններ, ես ներկայացրել եմ իմ տեսլականը. այդ պահին և հետագայում էլ չեմ մտածել՝ դա ինչ-որ մեկին դուր գալիս է, թե չի գալիս:

-Ձեր՝ Դատարանները շրջափակելու վերաբերյալ տեսակետը, կարծես, քվեարկության համար վճռորոշ եղավ:

-Ես ընդամենը մեկ բան եմ ասել՝ չեմ կիսում այն մոտեցումը, որը եղել է: Այսինքն՝ դատարաններ փակելը ես չեմ համարել հարցի լուծման ինձ համար ընդունելի տարբերակ, բայց մարդիկ տարբեր են և ունեն տարբեր մոտեցումներ, տարբեր հայացքներ: Սրա վրա չեմ ֆիքսվում և չեմ կարծում, որ խնդիրը եղել է պատասխանների՝ ինչ-որ մեկին հաճելի կամ տհաճ լինելը: Նորից եմ ասում՝ ես ներկայացրել եմ իմ տեսլականը, իմ մոտեցումները՝ երբևիցե չակնկալելով, որ դա ինչ-որ մեկին դուր կգա, կամ՝ ոչ: Խնդիրն այն է, եթե մարդիկ կիսում են իմ տեսակետը, համաձայն են դրա հետ, կողմ կքվեարկեն, չեն կիսում, համաձայն չեն, թող դեմ քվեարկեն:

-Կարծում եք՝ մարդիկ իրենց անձնական տեսակետից ելնելո՞վ քվեարկեցին:

-Ես այդ հարցին չեմ կարող պատասխանել, այդ հարցին կարող է պատասխանել միայն այն անձը, ով քվեարկել է: Ես իրավաբան եմ և սովոր եմ օբյեկտիվ գնահատել, փաստերն արձանագրել, սուբյեկտիվի մասին կարող եմ ենթադրություններ անել, որը հիմա չեմ անի: