Արտասահմանցի իրավաբանների խումբը փաստաթղթեր է պատրաստում Լուկաշենկոյին Հաագայի դատարանում պատասխանատվության ենթարկելու համար. Ցեպկալո

09:36 • 15.09.20

Բելառուսի նախագահի նախկին թեկնածու Վալերի Ցեպկալոն հայտարարել է, որ արտասահմանցի իրավաբանների մի խումբ փաստաթղթեր է պատրաստում Բելառուսի նախագահ Ալեքսանդր Լուկաշենկոյին Հաագայի միջազգային դատարանում պատասխանատվության ենթարկելու համար, ինչպես նաև նշել է, որ եվրոպական պատժամիջոցներն «ավելի քան բավարար կլինեն» միայն Լուկաշենկոյի և նրա շրջապատի նկատմամբ սահմանման դեպքում: Այս մասին գրում է «ՌԻԱ Նովոստի» գործակալությունը:

«Կարծում եմ՝ ավելի քան բավարար է, եթե Լուկաշենկոյի և նրա ընտանիքի նկատմամբ անհատական պատժամիջոցներ սահմանվեն»,-հայտարարել է Ցեպկալոն` պատասխանելով հարցին այն մասին, թե ինչպիսին պետք է լինի ԵՄ պատժամիջոցային քաղաքականությունը:

Նրա խոսքով ՝ պատժամիջոցները պետք է առնչվեն նաև ֆինանսական հիմնադրամներին և առևտրային կազմակերպություններին, որոնք «գործարքներ են իրականացնում Լուկաշենկոյի կողմից»:

Ցեպկալոն հայտարարել է նաև, որ այժմ տեղի է ունենում վկայությունների հավաքագրում այն մարդկանցից, որոնք նախագահական ընտրություններից հետո առաջին օրերի ընթացքում տուժել են ուժայինների գործողություններից:

«Այդ փաստաթղթերն ու փաստերը կներկայացվեն միջազգային դատարաններում: Այս բոլոր փաստերը կներկայացվեն Հաագայի միջազգային դատարանում: Մենք արդեն արտասահմանցի իրավաբանների խումբ ունենք, որը պատրաստում է բոլոր անհրաժեշտ փաստաթղթերը»,-հայտարարել է գործիչը:

Բողոքի ցույցերը Բելառուսում չեն դադարում օգոստոսի 9-ին կայացած նախագահական ընտրություններից ի վեր. ընդդիմադիրներն ու նրանց կողմնակիցներն ամեն օր փողոց են դուրս գալիս՝ բողոքելով ընտրությունների արդյունքներից, որոնց համաձայն՝ հաղթող է ճանաչվել երկրի գործող նախագահ Ալեքսանդր Լուկաշենկոն: