ԱՄՆ-ում հրդեհների հետևանքով 36 մարդ է մահացել. ԱՄՆ նախագահի թեկնածուներ Թրամփն ու Բայդենը ողբերգության պատճառների մասին տարբեր կարծիքներ ունեն (լուսանկարներ)
ԱՄՆ արևմտյան ափին բռնկված ուժգին անտառային հրդեհներն արդեն 36 մարդու կյանք են խլել. գործող նախագահ Դոնալդ Թրամփը և նախագահի թեկնածու Ջո Բայդենը ողբերգության պատճառների մասին տարբեր կարծիքներ ունեն, գրում է eadaily.com կայքը:
Թրամփի կարծիքով՝ հրդեհները տեղական իշխանությունների բարձիթողի աշխատելաոճի հետևանք են, իսկ Ջո Բայդենն ընդգծում է, որ կլիմայական փոփոխությունները և դրա հետևանքով առաջ եկած աղետներն այլևս անտեսել չի կարելի:
«Չեք հավաքում թափված տերևները, այդպես տարիներ շարունակ շերտը շերտի վրա... Այստեղ մի կայծն էլ հերիք է, որ ամեն բան կրակի մատնվի: Տեղական ինքնակառավարման մարմինները պետք է հետևողական աշխատանք տանեն այս ուղղությամբ: Պետք է անտառների ժամանակակից պաշտպանություն և հրդեհները կանխող միջոցառումներ կազմակերպվեն»,- ընդգծել է Թրամփը:
Կրակի հետևանքով ամենից շատ տուժած Վաշինգտոն, Օրեգոն և Կալիֆոռնիա նահանգները դեմոկրատներ են ղեկավարում, ուստի՝ նրանց հասցեին հնչեցված քննադատությունը Թրամփի նախընտրական քարոզարշավի մաս է կազմել:
Բայդենը, իր հերթին, հայտարարել է, որ Սպիտակ տունն անտեսում է կլիմայական փոփոխությունների խնդիրը, ինչը սարսափելի հետևանքների կարող է հանգեցնել:
«Ցանկանում եք, որ երկիրը կառավարի մի հրկիզի՞չ, որը չի հավատում կլիմայական փոփոխություններին: Իհարկե, նրա նմանների հետ բոլորս կարող ենք այրվել: Եվ ոչ միայն այրվել, կարող ենք խորտակվել, քանի որ գիտնականների հորդորները նրա համար պարզապես դատարկ ձայն են»,- նշել է քաղաքական գործիչը:
Հայտնի է, որ ԱՄՆ-ի արևմտյան հատվածում հրդեհներն ընդգրկել են մոտ 2 միլիոն հեկտար հողատարածք: Գիտնականները զգուշացնում են, որ շաբաթվա վերջին ծուխը կարող է հասնել Եվրոպա:















