«Սա Ադրբեջանի բռնապետ նախագահի հրահրած ագրեսիվ պատերազմն է»․ պատգամավոր Չարլի Վեյմերսի ելույթը Եվրախորհրդարանում (տեսանյութ)
Եվրոպական խորհրդի անդամ Չարլի Վեյմերսը Եվրախորհրդարանում այսօր լիագումար նիստի ժամանակ ելույթի ժամանակ կոչ է արել դատապարտել Ադրբեջանի նախագահ Իլհամ Ալիևին՝ Արցախում Թուրքիայի աջակցությամբ պատերազմ հրարելու համար։ Իր ելույթի տեսանյութը Վեյմերսը հրապարակել է թվիթերյան էջում։
«Սա Թուրքիայի նախագահ Էրդողանի ջիհադիստական դաշնակիցների աջակցությամբ Ադրբեջանի բռնապետ Ալիևի հրահրած ագրեսիվ պատերազմն է»,- հայտնել է Վեյմերսը։
Վեյմերսը նաև կոչ է արել պատժամիջոցներ կիրառել Ալիևի նկատմամբ, իսկ Թուրքիային հեռու պահել ԵԱՀԿ Մինսկի խմբից։
Հիշեցնենք, որ ԵՄ արտաքին և անվտանգության քաղաքականության հարցերով բարձր ներկայացուցիչ, Եվրոպական հանձնաժողովի փոխնախագահ Ժոզեպ Բորելը Եվրախորհրդարանում ելույթի ժամանակ հայտարարել էր, որ Լեռնային Ղարաբաղի հակամարտությունում բանակցությունների վերսկսման համար Հայաստանին Ադրբեջանի ներկայացրած պահանջները դժվար իրագործելի են:
«Ինձ նաև Ադրբեջանի արտգործնախարարի հետ զրույցի ընթացքում ասվածն է շատ անհանգստացնում: Նա նշել է, որ մարտերը շարունակվելու են այնքան ժամանակ, քանի դեռ Հայաստանը Ղարաբաղից դուրս գալու կոնկրետ ժամանակացույցին չի համաձայնել: Բանակցությունների վերսկսման համար այս պայմանը շատ բարդ է, և իրավիճակն ամեն օր վատթարանում է»,- նշել էր Բորելը:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 7-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 126 անօդաչու թռչող սարք, 379 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 3454 զոհ, ավելի քան 5270 վիրավոր։ Հայկական կողմից, նախնական տվյալներով, կա 291 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում վիրավորվել է 80 քաղաքացիական անձ, զոհվել՝ 19 մարդ, վնասվել՝ մոտ 2700 գույք ու ենթակառուցվածք։
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։
Տեսանյութը կարող եք դիտել այստեղ։










