Սա պատերազմ է, որտեղ Ադրբեջանը թաքցնելու շատ բաներ ունի. WarGonzo նախագծի հեղինակ Սեմյոն Պեգով (տեսանյութ)

16:45 • 07.10.20

Ռուս լրագրող, բլոգեր, WarGonzo նախագծի հեղինակ Սեմյոն Պեգովն արդեն մի քանի օր է՝ գտնվում է Լեռնային Ղարաբաղում: «Արմնյուզ» հեռուստաընկերության մեկնաբան Լիլիթ Թումանյանի հետ զրույցում նա անդրադարձել է պատերազմական իրավիճակները լուսաբանելու փորձին՝ նշելով, որ Արցախում վտանգավոր է, որովհետև ռմբակոծվում է խաղաղ բնակչությունը:

«Միանման պատերազմներ չկան, կան ընդհանուր անվտանգության կանոններ, որոնք պահպանում ես, բայց այստեղ ամեն ինչ պետք է վերանայել, որովհետև Ադրբեջանը Սմերչով հարվածում է քաղաքին: Ես այսպիսի բան չէի տեսել, որ հրետակոծվի խաղաղ բնակչությունը՝ երեխաները, տատիկներն ու պապիկները: Նույնիսկ առաջին գծում եմ եղել, բայց ամենասարսափելին քաղաքների հրետակոծումն էր: Դա անմարդկային է»,- ասել է Սեմյոն Պեգով։

Սա Ռուս լրագրողի 5-րդ թեժ կետն է․ նա պատերազմական գործողություններ է լուսաբանել նաև Աբխազիաում, Եգիպտոսում, Սիրիայում, Դոնբաս և Ղրիմում։

Կողմերի նախընտրություններ Սեմյոն Պեգովը չունի, սակայն նշում է, որ նախընտրելի է այն տեղը, որտեղ թույլ են տալիս աշխատել, կատարել լրագրողի մասնագիտական պարտականությունները:

«Երբ տեսնում ես, որ երկիրը թաքցնելու ոչինչ չունի, բաց է, պատրաստ երկխոսության և գործակցության, իհարկե, ավելի հանգիստ է աշխատելը: Ադրբեջանն ավելի փակ է միջազգային լուսաբանման կամ ազատ լրագրողների համար: Ես կարծում եմ, որ այդ երկիրը շատ թաքցնելու բան ունի»,- ասել է նա։

Հիմա Սեմյոն Պեգովն Արցախում ամեն օր փոխում է բնակության վայրը, քանի որ ադրբեջանցիները զանգահարում են հյուրանոցի ընդունարան, ներկայանալով հարազատ կամ գործընկեր փնտրող մարդ, ճշտում են այցելուների քանակը, ազգությունը։ «Ես առաջին անգամ եմ հանդիպում սրան»,– ասում է նա։

Մանրամասները՝ տեսանյութում: