Բրիտանական BP ընկերությունն ուժեղացնում է անվտանգությունն Ադրբեջանի իր ենթակառուցվածքներում. Reuters
Բրիտանական British Petrolium խոշորագույն նավթային ընկերությունն ուժեղացնում է անվտանգությունն Ադրբեջանում գտնվող իր ենթակառուցվածքներում: Ինչպես հայտնում է Reuters գործակալությունը, նման որոշում է կայացվել Բաքու-Թբիլիսի-Ջեհյուն գազատարի դեմ ենթադրյալ հարձակումների մասին լուրից հետո, որը տարածել էր Ադրբեջանը:
«BP-ն խիստ մտահոգված է ռազմական բախումների ընդլայնմամբ, որոնք ուղղված են նաև բնակելի շրջանների դեմ»,- ասվում է ընկերության հաղորդագրության մեջ:
Բաքու-Թբիլիսի-Ջեհյուն խողովակաշարով անցնում է ադրբեջանական արտահանվող նավթի 80 տոկոսը, դրանով օրական ավելի քան 500 000 բարել նավթ է հոսում:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 7-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 126 անօդաչու թռչող սարք, 379 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 3454 զոհ, ավելի քան 5270 վիրավոր։ Հայկական կողմից, նախնական տվյալներով, կա 291 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում վիրավորվել է 80 քաղաքացիական անձ, զոհվել՝ 19 մարդ, վնասվել՝ մոտ 2700 գույք ու ենթակառուցվածք։
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։










