Ֆրանսիայի ԱԳ նախարարը մատնանշել է Թուրքիայի ռազմական ներգրավվածությունը ԼՂ հակամարտությունում

20:15 • 07.10.20

Թուրքիան ներգրավված է Լեռնային Ղարաբաղում տեղի ունեցող ռազմական գործողություններին: ТАСС գործակալության փոխանցմամբ՝ այս մասին չորեքշաբթի հայտարարել է Ֆրանսիայի ԱԳ նախարար Ժան-Իվ Լե Դրիանը Ազգային ժողովի արտաքին հարցերով հանձնաժողովի լսումներում:

«Նորությունը Լեռնային Ղարաբաղի հակամարտության հարցում այն է, որ այնտեղ նկատվում է Թուրքիայի ռազմական ներգրավվածությունը: Դա սպառնալիք է հակամարտության միջազգայնացման համար, ինչից ամեն կերպ փորձում ենք խուսափել»,- ասել է ֆրանսիացի նախարարը:

«Ֆրանսիան արդեն բազմիցս հայտարարել է իր դիրքորոշման մասին: Մենք կողմ ենք, որ բոլոր կողմերը գիտակցեն, որ պետք է հնարավորինս շուտ դադարեցնել ռազմական գործողություններն առանց նախապայմանների»,- հավելել է Լե Դրիանը:

Վերջինս ընդգծել է, որ իրավիճակը Լեռնային Ղարաբաղում ներկա պահին շատ մտահոգիչ է, և Ֆրանսիան մոբիլիզացնում է իր բոլոր ջանքերը կարգավորման հասնելու համար:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 7-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 126 անօդաչու թռչող սարք, 379 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 3454 զոհ, ավելի քան 5270 վիրավոր։ Հայկական կողմից, նախնական տվյալներով, կա 291 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում վիրավորվել է 80 քաղաքացիական անձ, զոհվել՝ 19 մարդ, վնասվել՝ մոտ 2700 գույք ու ենթակառուցվածք։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։