Ֆիզուլիից, Հադրութից, Մարտունուց հայտնաբերվել է ևս 10 զոհված զինծառայողի մարմին․ Արցախի ԱԻՊԾ

Որոնողական աշխատանքների արդյունքում երեկ հայտնաբերվել է 10 մարմին՝ 5 աճյուն դուրս է բերվել Ֆիզուլիից, 4 աճյուն` Հադրութից, 1-ը՝ Մարտունուց։ Այս մասին Tert.am-ի հետ զրույցում ասաց Արցախի Հանրապետության արտակարգ իրավիճակների պետական ծառայության տեղեկատվության և հասարակայնության հետ կապերի բաժնի պետ Հունան Թադևոսյանը։

«Երեկոյան տվյալները կթարմացվեն, քանի որոնողական աշխատանքները նշված հատվածներում շարունակվում են։ 3 ջոկատ աշխատում է»,-մանրամասնեց նա։

Հունան Թադևոսյանը հիշեցրեց, որ ստեղծվել է նաև օպերատիվ շտաբ, որի տվյալների հիման վրա կատարվում են հասցեական որոնողական աշխատանքներ։

«Օպերատիվ շտաբին տեղեկություններ են տրամադրում նաև ծնողները։ Տեղեկությունները հավաքագրվում են, քարտեզագրում է կատարվում»,-ասաց նա։

Հունան Թադևոսյանը հիշեցրեց, որ մինչ օրս, ընդհանուր առմամբ, հայտնաբերվել է 1155 զոհված զինծառայողի մարմին: