ԱՄՆ–ն պատրաստ է աջակցել Ճապոնիային Չինաստանի հետ վիճելի Սենկակու կղզիները պաշտպանելու հարցում․ Պենտագոն
Պենտագոնի նոր ղեկավար Լլոյդ Օսթինը Ճապոնիայի պաշտպանության նախարար Նոբուո Կիսիի հետ զրույցում հայտարարել է, որ ԱՄՆ-ն պատրաստ է պաշտպանել Չինաստանի հետ վիճելի Սենկակու կղզիները: Այս մասին գրում է «ՌԻԱ Նովոստի» գործակալությունը:
«Պաշտպանության նախարար Օսթինը հաստատել է, որ ԱՄՆ-Ճապոնիա անվտանգության պայմանագրի 5-րդ հոդվածն ընդգրկում է Սենկակու կղզիները, և որ ԱՄՆ-ն դեմ է Արևելյաչինական ծովում ստատուս-քվոն փոխելու ցանկացած միակողմանի փորձի»,- ասվում է Պենտագոնի հայտարարության մեջ:
Պայմանագրի վերոնշյալ հոդվածը ենթադրում է, որ ԱՄՆ-ն և Ճապոնիան պետք է համատեղ պաշտպանվեն երկրներից մեկի զինված սպառնալիքից:
Կողմերը քննարկել են նաև Ճապոնիայում ամերիկյան ուժերի վերաբաշխման հարցը և ԿԺԴՀ-ի հարցը:










