«Բոլորն իրավունք ունեն արտահայտել իրենց տեսակետը, սակայն օրենքով սահմանված շրջանակում». Պուտինը՝ հաջակցություն Նավալնիի բողոքի ակցիաների մասին
Ռուսաստանի Դաշնության նախագահ Վլադիմիր Պուտինը, մեկնաբանելով շաբաթ օրը տեղի ունեցած չհամաձայնեցված բողոքի գործողությունները, ասել է, որ յուրաքանչյուր ոք իրավունք ունի տեսակետ հայտնել, բայց օրինական ճանապարհով, և որ օրենքից դուրս գալը ոչ միայն անարդյունավետ է, այլ վտանգավոր է և արդեն իսկ հանգեցրել է հասարակության պառակտմանը: Այս մասին գրում է «ՌԻԱ Նովոստի» գործակալությունը:
«Ես արդեն բազմիցս խոսել եմ այսպիսի թեմաների շուրջ և ուզում եմ շեշտել. բոլոր մարդիկ իրավունք ունեն արտահայտել իրենց տեսակետը օրենքով սահմանված շրջանակներում: Օրենքի սահմաններից դուրս ցանկացած բան ոչ միայն անարդյունավետ է, այլև վտանգավոր»,-ասել է Պուտինը Ուսանողների օրվա առթիվ համալսարանականների հետ հանդիպմանը:
Նրա խոսքերով՝ իր պատմության ընթացքում Ռուսաստանը բազմիցս բախվել է իրադարձությունների հետ, «երբ իրավիճակը օրենքի սահմաններից շատ է դուրս եկել և հանգեցրել է հասարակության և պետության այնպիսի ցնցման, որից տուժում էին ոչ միայն նրանք, ովքեր ցնցում էին պետությունն ու հասարակությանը, այլ նաև մարդիկ, ովքեր դրա հետ ոչ մի կապ չունեին»:
Հիշեցնենք, որ շաբաթ օրը ՌԴ տարբեր քաղաքներում բողոքի ակցիաներ են տեղի ունեցել՝ հաջակցություն ընդդիմադիր գործիչ Ալեքսեյ Նավալնիի, որն այժմ ձերբակալված է:










