Կայացավ «Արտազի երեք վանքերը» գրքի շնորհանդեսը

Հուշարձանագետ Սամվել Կարապետյանն այսօր լրագրողներին ներկայացրեց վերջերս լույս տեսած «Արտազի երեք վանքերը» գիրքը։
Այն ներկայացնում է ՅՈՒՆԵՍԿՈ-ի ցուցակում հայտնված Մեծ Հայքի երեք ամենահայտնի վանքերը՝ Թադեոս Առաքյան, Մաղարթավանք կամ Ստեփանոս Նախավկա և Ծործորի Սուրբ Աստվածածին:

Գրքի հեղինակը հայկական ճարտարապետությունն ուսումնասիրող հիմնադրամի հիմնադիր նախագահ ճարտարապետության դոկտոր, երջանկահիշատակ Արմեն Հախնազարյանն է:

Սամվել Կարապետյանը տեղեկացրեց, որ իրենք ընդամենը որոշ լրացումներ են արել գրքում:

«Զուտ ճարտարապետական բոլոր ուսումնասիրությունները պատկանում են Արմեն Հախնազարյանին: Մենք միայն գրքում զետեղել ենք վանքերի որմերի վրա դարերի ընթացքում փորագրված գրությունները և դրանք վերծանել գրքում: 700-ից ավելի վերծանումներ կան:

Գրքում զետեղված է նաև գրությունների լուսանկարները»,- ասաց նա:

Սամվել Կարապետյանը տեղեկացրեց նաև, որ գրքում տեղ են գտել ճարտարապետական մանրամասն չափագրումներ: Գիրքը հագեցած է լուսանկարներով, ինչպես նաև քարտեզներով, որպեսզի ընթերցողը շատ լավ պատկերացնի, թե որտեղ են գտնվում այդ վանքերը:

Հարցին, թե բացի այս եկեղեցիներից ևս քանիսը կան Իրանի տարածքում, Սամվել Կարապետյանը պատասխանեց.

«Իրանում կան 400-ից ավելի եկեղեցիներ: Բայց հայտնի չէ, թե քանի հայկական հուշարձան կա, որովհետև ոչ մի հաշվառում արված չէ»,- ասաց նա և ավելացրեց, որ չնայած դրան, Իրանում հուշարձանների պահպանության նկատմամբ հօգատարություն կա:

Գիրքը տպագրվել է 700 օրինակով: