Եղանակն՝ այսօր
Արամ Խաչատրյանի անվան եռյակը համերգներով հանդես կգա մարզերում
Կոմպոզիտոր Արամ Խաչատրյանի ծննդյան հոբելյանական տարում Արամ Խաչատրյանի անվան եռյակի անդամները` Կարեն Շահգալդյանը, Արմինե Գրիգորյանը, Կարեն Քոչարյանը, հունիսի 6-ից հանրապետությունում հանդես են գալու համերգային ծրագրերով և վարպետության դասերով, այսօր այս մասին լրագրողների հետ հանդիպման ժամանակ նշեցին եռյակի մասնակիցներ՝ Կարեն Շահգալդյանն ու Արմինե Գրիգորյանը:
Հարցին` արդյո՞ք, իրականությանը համապատասխանում է այն տեսակետը, թե մարզերում դասական երաժշտությունն ընդունելի չէ, Արմինե Գրիգորյանը ժխտեց` նշելով, որ մշտապես մարզերում հանդիսատեսը մեծ հաճույքով է գալիս համերգներին։
«Մի քանի տարի շարունակ գնում ենք մարզեր, մեր ելույթներն անցնում են լեփ-լեցուն դահլիճներում»,– ասաց նա:
Կարեն Շահգալդյանն իր հերթին նշեց, որ մարզերում դասական երաժշտության պակասը մշտապես զգացվում է և այն նման է անհասանելի երազանքի:
«Դասական երաժշտության նկատմամբ սերը մարզերի բնակիչների համար նման է տիեզերական նավի` սիրում են, բայց չեն տեսնում: Ցանկություն կա մարզեր մեկնել համերգների, բայց եթե բիզնեսի լեզվով խոսենք՝ չկա այդ ապրանքը: Մարդիկ շատ են գալիս, «մաստեր կլասներին» գալիս են շատ երեխաներ»,- նշեց Շահգալդյանը:
Բանախոսները տեղեկացրեցին, որ մարզերում դասական երաժշտության զարգացման նպատակով, դեռ մեկ տարի առաջ թավջութակի դասարան են բացել Վանաձորում, ինչին աջակցել է «Դասական երաժշտության զարգացման» հիմնադրամը: Բացի այդ, սերտ կապեր են հաստատել մարզային երաժշտական դպրոցների հետ:
Արամ Խաչատրյանի ծննդյան օրվա կպակցությամբ, Շահգալդյանի խոսքով, նախատեսվում է ձայնագրել կոմպոզիտորի կամերային ստեղծագործությունները, որոնք, վերջինիս փոխանցմամբ, գրեթե անհայտ են հանդիսատեսին:
Բացի այդ, այս տարի լրանում է նաև Արամ Խաչատրյանի «Գայանե» բալետի 70-ամյակը, ինչի կապակցությամբ ևս Արամ Խաչատրյանի անվան եռյակը նախատեսել է միջոցառումներ կազմակերպել:
«Աշնանը նախատեսում ենք հետաքրքիր հանդիպումներ կազմակերպել այն մարդկանց հետ, ովքեր կապ են ունեցել բալետի պատմության հետ»,-տեղեկացրեց Շահգալդյանը:
Երևանում տեղի կունենա «Երաժշտական ճամփորդություն» համերգը, ինչը՝ չնայած դուրս է կոմպոզիտորի ծննդյան օրվա կապակցությամբ նախատեսված ծրագրերի շարքից, սակայն, Արմինե Գրիգորյանի տեղեկացմամբ, համերգի ընթացքում կհնչի նաև խաչատրյանական երաժշտություն:
«Սա սովորական համերգ չէ, ավելի շատ փորձարարական բնույթ է կրում: Էկրանի վրա կցուցադրվեն տարբեր երկրների տեսարժան վայրերը ներկայացնող պատկերներ, ինչը կուղեկցվի տվյալ երկրի հայտնի երաժշտական կատարումներով»,- նշեց Գրիգորյանը:
Համերգի մտահաղացումը, նրա խոսքով, Արամ Խաչատրյանի անվան եռյակինն է և այն որևէ երկրի կողմից չի հովանավորվում:
Համերգի ընթացքում կցուցադրվեն Հունգարիայի, Ռումինիայի, ֆրանսիայի, Իտալիայի, Արգենտինայի, Հայաստանի տեսարժան վայրերը:
Համերգը տեղի կունենա մայիսի 30-ին՝ Գաֆեսճէան մշակույթի կենտրոնում:
Studio One