Իտալացի լեռնագնաց Տիտո Դե Լուկայի «Արարատ` Նոյյան տապանի հետքերով» գրքի շնորհանդեսը

Շատերը գիտեն Նոյյան տապանի բիբլիական պատմությունը, որը համաշխարհային ջրհեղեղից հետո իր հանգրվանը գտավ Արարատ լեռան վրա: Սակայն քչերին է հայտնի, որ Արարատը գտնվում է պատմական Հայաստանի սրտում, որ բիբլիական սարի փեշին փռված Արարատյան դաշտավայրը դարձավ Նոյի տունը, իսկ Հայաստանը՝ նրա հայրենիքը:

Այս մասին, ՀՀ ԱԳ նախարարության լրատվական ծառայության տեղեկացմամբ, ասել է Իտալիայում ՀՀ դեսպան Ռուբեն Կարապետյանը՝ հունիսի 14-ին Իտալիայում կազմակերպված իտալացի լեռնագնաց Տիտո Դե Լուկայի «Արարատ` Նոյյան տապանի հետքերով» գրքի շնորհանդեսի ժամանակ:

Դեսպան Կարապետյանը կարևորելով գրքի հրատարակումը, ասել է, որ այն նվիրված է բացառիկ հետաքրքություն ներկայացնող մի թեմայի, որը մեծ նշանակություն ունի ոչ միայն հայ ժողովրդի, այլև ողջ մարդկության համար:

Վերջինս իր ելույթում նաև ընդգծել է, որ այս միջոցառումն առավել կարևորություն է ձեռք բերում, հատկապես այսօր, երբ պատմությունը խեղաթյուրելու և հայկական մշակույթի տարրերը գողանալու և դրան որպես սեփական ներկայացնելու քաղաքականությունը Հայաստանի որոշ հարևանների կողմից ընդունել է առավել ագրեսիվ բնույթ:

Վերջինս համոզմունք է հայտնել, որ նման միջոցառումները նպաստում են հայկական քաղաքակրթության մասին տեղեկությունների հանրայնացմանը` հանդիսանալով ամենալավ միջոց հետագա պատմական շահարկումները թույլ չտալու համար:

Շնորհանդեսին ելույթ են ունեցել նաև իտալական աշխարհագրական ընկերության նախագահ Ֆրանկո Սալվատորին, գրքի հեղինակ Տիտո Դե Լուկան, Հռոմի Ռոմա-3 և Պիզայի համալսարանների գիտնականները:

Միջոցառմանը, որը տեղի է ունեցել Հռոմի կենտրոնում գտնվող Իտալական աշխարհագրական ընկերության պատմական նստվայր հանդիսացող Վիլլա Չելիմոնտանայում, մասնակցել են Իտալիայում հավատարմագրված դիվանագետներ, մշակույթի և գիտական շրջանակների, իտալական մամուլի, հայ համայնքի բազմաթիվ ներկայացուցիչներ:

Տեղեկացնենք, որ սույն միջոցառումը կազմակերպվել էր ՀՀ դեսպանության և Իտալական աշխարհագրական ընկերության նախաձեռնությամբ: