Վարչապետի ցավակցական խոսքը հայ անվանի երգչուհի Ֆլորա Մարտիրոսյանի մահվան կապակցությամբ

ՀՀ վարչապետ Տիգրան Սարգսյանը խոր ցավակցություն է հայտնել ՀՀ ժողովրդական արտիստ Ֆլորա Մարտիրոսյանի անժամանակ մահվան կապակցությամբ։

Ստորև ներկայացնում ենք ՀՀ կառավարության տեղեկատվության և հասարակայնության հետ կապերի վարչության տարածած վարչապետի ցավակցական խոսքը։

«Խոր վշտով տեղեկացա անվանի հայ երգչուհի, Հայաստանի ժողովրդական արտիստ Ֆլորա Մարտիրոսյանի մահվան մասին:

Նա մեր ժամանակների բացառիկ երգչուհիներից էր, ով իր անզուգական ձայնով գերել է բազմաթիվ սրտեր ու հոգիներ: Մեծ ու անգնահատելի է Ֆլորա Մարտիրոսյանի ավանդը հայ երգարվեստում: Նրա թողած ժառանգությամբ դեռ կշարունակեն հիանալ բազմաթիվ սերունդներ:

Հայաստանի Հանրապետության կառավարության և անձամբ իմ անունից ցավակցում եմ Ֆլորա Մարտիրոսյանի ընտանիքի անդամներին, հարազատներին, ընկերներին և նրա արվեստի բազմահազար երկրպագուներին»։